"Xaçapuri" qida məhsulunun içindən plastik dırnaq çıxdı!

Nə qədər qorxunc, nə qədər iyrənc bir hadisə...

"MUMtv.az"  "DogruXeber.az"a istinadən  xəbər verir ki, bu barədə sosial şəbəkələrdə görüntülər yayılıb. Görüntülərdə vətəndaş qeyd edir ki, "Bravo" marketdən xaçapuri alıblar, xəmirin içindən dırnaq qırıntıları çıxıb. Hətta, qırıntılardan birini bilmədən udduğunu da vurğulayıb.

Videonu izləmək üçün bu yazıya toxun !

Ölkədə əvvəllər fəaliyyət göstərən kiçik sahibkarın fəaliyyəti, aidiyyatı olan-olmayan qurumların əməkdaşları tərəfindən o, qədər sıxışdırılırdı ki, çalışan hər kəs "dörd göz" olurdu. Bir yandan qurumların yersiz "yoxlamalar"ı, bir yandan da günü-gündən artan şəbəkə marketlərin çörək, şirniyyat, hətta kabab, ləvəngi və sair bişirməkləri bu sahədə fəaliyyət göstərən iaşə obyektlərinin böyük əksəriyyətini aradan çıxardı.

Elə ki, ölkə başçısının müvafiq sərəncamına əsasən, sahibkarlığın inkişafına dəstək məqsədilə yoxlamalar dayandırıldı, əksəriyyətinin "kökü oliqarx məmurlara söykənən" böyük şəbəkə marketlər, şəbəkə restoranların fəaliyyəti böyüməyə başladı.

Amma, insanların sağlamlığı üçün ən vacib olan qida məhsullarının təhlükəsizliyinin təmin edilməsi məqsədilə bu sahəyə nəzarət etməli olan xüsusi qurum - Azərbaycan Qida Təhlükəsizliyi Agentliyi (AQTA) yaradıldı. Maraqlıdır ki, bu qurumun cəmiyyətə verdiyi hesabatların böyük əksəriyyətini kiçik dönərxanalarda aparılan yoxlamalar təşkil edir. Baxmayaraq ki, sahibi böyük türk iş adamı olan "Böyükfırat" və bu kimi bir çox restoranlar şəbəkələrində də müştərilərə qadağa olunduğu deyilən toyuq dönəri təklif edilir.

Bundan əlavə, bir müddət əvvəl böyük şəbəkə marketlərdən biri olan "Oba" marketlər şəbəkəsinin AQTA -da qeydiyyatının ləğv edildiyi barəsində məlumat mətbuatda yer aldı.

Bəs, qeydiyyatın ləğvindən sonra - yəni bu gün də fəaliyyətdə olan bu marketlər şəbəkəsində satılan qidalara nəzarəti kim həyata keçirir?

Yaxud, sualı belə qoyaq, AQTA necə nəzarət edir ki, bu gün bir-birinə qarışmış pendir, toyuq, ət, şoraba, balıq, xarab meyvələr və sair qoxusundan "Vasmoy bazarı" kimi böyük bazarlara yaxın düşmək olmur?

Bu nəzarət necə aparılır ki, "Bravo" kimi böyük marketlərdə satılan qida məhsulunun içindən plastik dırnaqlar çıxır?

Qida məhsullarının istehsal edildiyi müəssisədə çalışanlarda plastik dırnaqlar niyə var ki, o, dırnaqlar da istehsal olunan qidanın içinə düşüb, insanların sağlamlığı üçün təhlükəyə çevrilir?

Qida istehsalı müəssisələrində çalışan şəxslərin təmizliyinə nəzarət etməyən qurumun, onların sağlamlığına necə "nəzarət" etdiyini də təxmin etmək artıq mümkündür.
Allah qorusun, çalışanlar arasında hər hansı bir yoluxucu xəstəliyi olan insanlar olarsa, bu həmin müəssisədə onunla birlikdə çalışan, eləcə də onun bu cür dırnaqlı, əlcəksiz (bu dırnaqdan bəlli olur) əllərinin hazırladığı qidalardan yeyən yüzlərlə insanların sağlamlığı və həyatı üçün təhlükə deyilmi?

P.S: Qeyd edək ki, görüntülərlə bağlı "Bravo" hiper marketlər şəbəkəsinin ictima əlaqələr şöbəsi ilə əlaqə saxlamaq cəhdlərimiz nəticəsiz qaldı.

Görüntülərlə bağlı AQTA və "Bravo" marketlər şəbəkəsinin də açıqlamasını dinləməyə hazırıq.

DogruXeber.az