Azərbaycan Xarici İşlər Nazirliyinin Konsulluq İdarəsi və ölkənin konsulluqları tərəfindən rəsmi sənədlərin leqallaşdırılması məqsədilə “Konsul leqallaşdırılması” informasiya sistemi təsis ediləcək.

“MUMtv.az” İqtisadiyyat Nazirliyi yanında Dövlət Vergi Xidmətinə (DVX) istinadən xəbər verir ki, bu məsələ xidmətin “Biznesə daxilolma” İşçi qrupunun videokonfrans formatında keçirilən iclasında müzakirə edilib.

Həmçinin görüşdə leqallaşdırılmış sənədlərin tərcüməsinin “Elektron notariat” informasiya sistemi üzərindən notarius tərəfindən distant rəsmiləşdirilməsi və ünvana çatdırılması xidmətinin təşkili üzrə proseslər xəritəsinin hazırlanması və bu məqsədlərlə proqram təminatlarının yaradılması istiqamətində görülmüş işlər müzakirə edilib.

İşçi qrupunun rəhbəri, Dövlət Vergi Xidmətinin rəis müavini Samirə Musayeva 2022-2023-cü illərdə qrup tərəfindən həyata keçirilmiş işlər və layihələr, habelə iclasın gündəliyində olan əsas məsələlər barədə məlumat verib, ötən müddət ərzində görülən işlərin səmərəli olduğunu qeyd edib.

Biznes Mühiti və Beynəlxalq Reytinqlər üzrə Komissiyanın Katibliyinin rəhbəri, Prezident Administrasiyasının İqtisadi siyasət və sənaye məsələləri şöbəsinin sektor müdiri Vüsal Şıxəliyev işçi qrupun aktiv fəaliyyət göstərdiyini və biznesin qeydiyyatı sahəsində aparılan işlərin əhəmiyyətini vurğulayıb, biznes sektorunun hüquqi şəxslərin qeydiyyatı sahəsində aparılan islahatlar və qanunvericilikdə gözlənilən yeniliklər barədə daha intensiv şəkildə məlumatlandırılmasının zəruriliyini vurğulayıb.

Sonra "Business Ready" hesabatının “Biznesə daxilolma” indikatoru üzrə qeyd olunan tapşırıqların icra vəziyyətinin, hesabatın müvafiq indikatorunun sualları üzrə dövlət və özəl sektorun cavabları arasındakı fərqli məqamların müzakirəsi aparılıb. İşçi qrupun üzvü, DVX-nin Vergi ödəyicilərinin qeydiyyatı və uçotu baş idarəsinin rəis müavini Hüsniyyə Abdullayeva “Biznesə daxilolma” indikatoru ilə bağlı müvafiq sahədə təkmilləşmələrin və kommunikasiyanın həyata keçirilməsinə dair 2024-cü il üzrə Yol Xəritəsində nəzərdə tutulmuş tədbirləri diqqətə çatdırıb. Görüşdə məlumatlandırma, təbliğat və təşviqat işlərinin həyata keçirilməsi üzrə kommunikasiya planı barədə məlumat verilib.

S. Musayeva Yol Xəritəsi çərçivəsində bir sıra layihələr üzrə nəticələrin müsbət olduğunu bildirib, xüsusən xarici investisiyalı hüquqi şəxslər üzrə xarici dildə sənədlərin autentifikasiyası istiqamətində nəzərdə tutulan işlərin proqressivliyi barədə məlumat verib.

“Hüquqi şəxslərin dövlət qeydiyyatı və dövlət reyestri haqqında” Qanunda nəzərdə tutulan bir sıra dəyişikliklərin ölkədə biznesin qeydiyyatı sahəsində yeniliklər gətirəcəyi bir daha vurğulanıb. 2024-cü ildə proseslərin başa çatdırılması üçün zəruri olan işlər üzrə səylərin artırılması və işçi qrup tərəfindən əlavə dəstəyin verilməsi tövsiyə edilib.

Görüşdə Dövlət Vergi Xidməti ilə yanaşı, Xarici İşlər Nazirliyi, Ədliyyə Nazirliyi, İqtisadi İslahatların Təhlili və Kommunikasiya Mərkəzi, Kiçik və Orta Biznesin İnkişafı Agentliyi və ölkənin aparıcı konsaltinq şirkətlərinin nümayəndələri iştirak ediblər.