Dünən Azərbaycan Prezidenti yanında Əfv Məsələləri Komissiyasının sonuncu iclası keçirilib.

Bununla da Komissiya növbəti əfv sərəncamının imzalanması üzrə işini yekunlaşdırıb. Bu müddətdə ümumilikdə 1000-dən çox müraciətə baxılıb. Komissiya sənədləri ümumiləşdirərək Azərbaycan Prezidenti İlham Əliyevə təqdim edəcək.

Hüquq müdafiəçiləri yaxın günlərdə böyük əfv sərəncamı veriləcəyini bildirir. Kimlərin əfv ediləcəyi Prezidentin səlahiyyətində olsa da, hər halda cəmiyyətdə komissiyanın hansı müraciətlərə baxdığı, siyahıda kimlərin adlarının olması ehtimalı maraq doğurur.

Azərbaycan Respublikasının Prezidenti yanında Əfv Komissiyasının üzvü, millət vəkili Fazil Mustafa Cebhe.info-ya açıqlamasında bildirib ki, siyahı ölkə Prezidentinə təqdim olunub:

"Kimlərin əfv olunacağı dövlət başçısının müstəsna səlahiyyətidir. Hətta bizim verdiyimiz siyahıda olan bir qrup şəxslər belə Prezident tərəfindən təsdiqlənməyə bilər. Bizim siyahı sadəcə olaraq təklif kimi təqdim olunur. Bu, Prezidentin yaratdığı işçi qrupudur və bu qrup vasitəsilə müzakirə aparılır və məqsədəuyğunluq göstərilir. Prezidentin öz mülahizəsi ilə də siyahıya əlavə kimlərsə daxil edilə, kimlərsə çıxarıla bilər, artıq onu söyləmək mümkün deyil. Siyahıda kimlərin olacağı yalnız sərəncam veriləndən sonra bilinəcək”.

Gözlənilən əfv mətbuatda "böyük əfv” adlandırılır. Millət vəkili də böyük masştablı əfvin gözləndiyini deyib: "Hər halda böyük masştablıdır, çox sayda məhbusun azad olunması nəzərdə tutulur”.

Əfv sərəncamının hansı gün üçün gözlənilməsi ilə bağlı sualı da komissiya üzvü "Bilmirəm, yəqin ki bahar bayramına ola bilər. Ola bilsin ki, bir az gecikə də bilər. Yəni bu, bizim bilgimiz daxilində deyil”,- deyə cavablandırıb.