MUMtv.az:  Son günlər Kənd Təsərrüfatı Nazirliyində baş verən yeyintilərlə bağlı “Hurriyyet TV”-də açıqlanan faktlar qurumun rəhbərliyini hərəkətə gətirib.

Hurriyyet.az-a daxil olan məlumata əsasən, nazir Məcnun Məmmədovun göstərişi ilə müvafiq komissiya yaradılaraq, müxtəlif rayonların baytarlıq idarələrində yoxlama aparılmasına cəhdlər edilib. Məqsəd dövlət tərəfindən alınan vaksinlərin təyinatı üzrə istifadə olunub-olunmamasını üzə çıxarmaq olub. Bu səbəbdən də ilk olaraq anbarlarda qalan vaksinlərin sayılması qərara alınıb.

Lakin bəzi rayonlarda nazirlik əməkdaşlarının baytarlıq idarələrində yoxlama aparılmasına imkan yaradılmayıb. Maraqlıdır ki, komssiya üzləri nazir Məcnun Məmmədovun göstərişi əsasında yoxlama aparmaq məcburiyyətində olduqlarını bildirsələr də, baytarlar nazirlik əməkdaşlarına açıq şəkildə dirəniş göstəriblər. Onlar Aqrar Xidmətlər Agentliyi rəhbərliyinin göstərişini yerinə yetirdiklərini bildiriblər.

Onu da qeyd edək ki, nazirlik əməkdaşları daha sonra müxtəlif kəndləri gəzərək, heyvandarlıqla məşğul olan sakinlərlə söhbət ediblər. Bu zaman sakinlər ciddi çəkilə irad bildiriblər ki, vaksin vurulmadığı üçün heyvanları müxtəlif xəstəliklər səbəbindən tələf olur.

Komissiya üzvləri sakinlərin çoxsaylı şikayətlərini dinləyərək, yerindəcə aktlaşdırma aparıblar. Amma yekunda heç bir baytar həmin aktlara imza atmayıb. Onlar yenə də Aqrar Xidmətlər Agentliyindən belə bir göstəriş aldıqlarını və bu qurumun razılığı olmadan heç bir sənədə imza atmayacaqlarını bildiriblər.

P.S. Bütün bunlar onu deməyə əsas verir ki, Kənd Təsərrüfatı Nazirliyində “ikihakimiyyətlilik” hökm sürür. Aqrar Xidmətlər Agentliyinin rəhbəri hər kimdirsə, görünür, özünü ya nazir hesab edir, ya da Məcnun Məmmədova dirəniş göstərəcək qədər “arxalıdır”.

P.P.S. Mövzu ilə bağlı araşdırmamızı davam etdirəcəyik.

11-10-2025, 13:48