"Sahib nəslimizin ən kiçiyi idi, indi hamımızın ən böyüyüdür".
Bu sözləri şəhid Sahib Daşdəmirovun əmisi Bəhlul Daşdəmirov onun xatirəsinə inşa edilmiş abidənin açılışı zamanı "DogruXeber.az"a müsahibəsində deyib.

Qeyd edək ki, may ayının 5-də Abşeron rayonunun Fatmayi kəndində əmisinin təşəbbüsü ilə şəhid Sahibin xatirəsinə inşa edilmiş abidəsinin açılışı olub. Açılışda Xətai rayon icra hakimiyyətinin əməkdaşları, Şuşa şəhəri 9 nömrəli tam orta məktəbin direktor, müəllim heyəti və şagirdləri, şəhid ailələri və "DogruXeber.az" kollektivi iştirak edib.
















Qeyd edək ki, Daşdəmirov Sahib Natiq oğlu 1995-ci il mayın 6-da Bakı şəhəri, Nərimanov rayonunda anadan olub. Əslən Gürcüstan respublikasının Bolnisi rayonunun Saraçlı kəndindəndir. 2001-2008-ci illərdə Nərimanov rayonu 202 nömrəli tam orta məktəbdə təhsil alıb. 2009-cu ildən təhsilini Cəmşid Naxçıvanski adına hərbi liseydə davam etdirib. Liseyi bitirdikdən sonra 2012-ci ildə Heydər Əliyev adına Azərbaycan Ali Hərbi Məktəbinə daxil olub. 2016-cı ildə təhsilini tamamladıqdan sonra Azərbaycan Silahlı Qüvvələrində xidmətə başlayıb.

2016-cı il iyunun 23-dən 2017-ci ilin avqustun 30-a qədər Şəmkirdə yerləşən hərbi hissədə snayper tağımında, 2017-ci il avqustun 30-dan 2018-ci il mayın 25-ə qədər Qazaxda yerləşən hərbi hissədə, 2018-ci il mayın 25-dən 2020-ci il mayın 14-ə qədər Murovda yerləşən hərbi hissədə tağım komandiri vəzifəsində xidmət edib[6]. 2020-ci il mayın 14-dən 2023-cü il fevralın 2-ə qədər Gədəbəydə yerləşən hərbi hissədə bölük komandiri olub. 2023-cü il fevralın 2-dən etibarən Xocavənd rayonunda yerləşən hərbi hissədə tağım kamandiri kimi xidmət edib.

2023-cü il sentyabrın 20-də Azərbaycan Respublikasının Silahlı Qüvvələri tərəfindən həyata keçirilmiş lokal antiterror tədbirləri zamanı Xocavənd rayonunun Veysəlli kəndində şəhid olub.

Bakı şəhərində, II Şəhidlər Xiyabanında dəfn edilib.

Otən gün onun doğum günü idi. Günü qeyd etmək üçün şəhidin ailə üzvləri, yaxınları və digər şəhid ailələri "DogruXeber.az" kollektivinin də iştirakı ilə ikinci fəxri xiyabanda olub, onun məzarını ziyarət edib, ruhuna dualar oxuyub, məzarına əklillər düzdülər.

Tədbir iştirakçıları arasında Sahibin döyüş yoldaşları da var idi. Onlar "DogruXeber.az"a müsahibələrində Sahiblə bağlı bəzi xatirələrini danışarkən, qəhər boğa-boğa "biz bu gün də onun kazarmadakı yerini olduğu kimi saxlayırıq, sanki sabah gələcəkmiş kimi" deyə vurğuladılar.



Sahibin, Sahiblərin yeri təkcə xidmət etdiyi hərbi hissədə deyil, mübarizə meydanlarında və Azərbaycan tarixinin qələbədən yazan səhifələrində illər boyu hər zaman görünəcək.

Şəhidlər ölməz, Vətən bölünməz!

Onlar vətən üçün birlikdə vuruşdu, birlikdə qalib oldular. Onların qalibiyyəti isə yalnız onların, yaxud ailələrinin deyil, bütün dünyada Azərbaycanın qələbəsi, qalibiyyəti kimi tanındı.

Bu o, deməkdir ki, hər şəhid Azərbaycandır. Hər döyüşçü tarix yazan bir möcüzəvi qəhrəmandır.

Şəhidlərin ailələri onların xalqa, vətənə əmanətidir. Əmanətə sahib çıxmaq, onların yanında olmaq hər birimizin vətəndaşlıq borcudur.

Əlbəttə, onların sinəsindəki ömür boyu hər nəfəs aldıqca alovlanan övlad itkisi yanğısını söndürə bilməsək də, heçolmasa onları layiqli şəkildə anmaqla az da olsa təsəlli ola bilərik.

Şəhidlər eyni zamanda bizim dünyanı heyrətə gətirən tariximizdir, üzümüzün ağı, bayrağımızın ən uca zirvəsi, ən böyük qürurumuzdur.

Allah şəhidlərimizə rəhmət eləsin, ailələrinə səbr versin, qazi və veteranlarımızı, ordumuzu qorusun inşallah.

Amin.

DogruXeber.az