Bildiyimiz kimi 44 günlük Vətənimizin ərazi bütövlüyü uğrunda gedən müharibədə 30 ilə yaxın erməni işğalı altında olan Qarabağ torpaqlarımızı azad etmək üçün başda Ali Baş Komandan İlham Əliyev olmaqla, Onun rəhbərliyi altında "Dəmir yumruq" kimi ətrafında sıx birləşərək Vətənpərvər gənclərimiz Vətən deyib - haqq savaşına qatıldılar və torpaqlarımızı mənfur düşmənimiz olan erməni işğalçılarından qanları, canları bahasına azad etdilər.

Hörmətli oxucularımız belə igid, qorxmaz, qəhrəman, Vətənpərvər oğullarımızdan biri də 1996-cı il təvəllüdlü Sumqayıt şəhərində anadan olmuş Məmmədov Tərlan Müşfiq oğludur. 2003-2013-cü illərdə Hacı Zeynalabdin qəsəbəsində 19 nömrəli tam orta məktəbdə, 2013-2015-ci illərdə isə Abşeron rayonunun Ceyranbatan qəsəbəsində 147 nömrəli peşə məktəbində təhsil alıb. Subay idi.


"Qanunyolu.info.az" və "Zefertv.az" xəbər verir ki, bu gün Abşeron rayon Saray qəsəbəsində şəhid Məmmədov Tərlanın mövlud günündə şəhidimizin adına tikilmiş olan bulağın açılış mərasimi keçirildi. Açılışda şəhidin atası Müşfiq, anası Səadət xanım, Saray qəsəbə bələdiyyəsinin sədri Məhi Həsənov, Saray qəsəbə inzibati ərazi dairəsi üzrə nümayəndəsi Müşfiq İsmayılov, MN-nin nümayəndəsi, din xadimləri, şəhid anaları,şəhid ailələri və qazilər, media əməkdaşları, qəsəbə sakinləri şəhidin mövludunda və onun adına olan bulağın açılışında yaxından iştirak etdilər.


Tədbirdə ilk öncə Dövlət himni səsləndirildi. Sonra şəhidin xatirəsinə tikilmiş "Tərlan bulağı"nın üzərində olan ağ örpəyi şəhidin atası Müşfiq , anası Səadət xanım və qazilərimiz tərəfindən götürüldü. Şəhidlərimiz bir dəqiqəlik sükutla yad edildikdən sonra çıxış üçün söz Saray qəsəbə bələdiyyəsinin sədri Məhi Həsənova verildi. O, çıxış edərək şəhid haqqında öz ürək sözlərini tədbir iştirakçılarına çatdırdı, şəhidin valideynlərinə başsağlığı verib onlara Allahdan səbr dilədi.


Daha sonra söz Saray qəsəbə inzibati ərazi dairəsi üzrə nümayəndəsi Müşfiq İsmayılova verildi. Müşfiq müəllim də öz çıxışında 44 günlük qələbəmizdən, qazilərimizin döyüşdə göstərdikləri şücaətlərindən, canlarını, qanlarını torpaqlarımız uğrunda qurban verən qəhrəman, igid şəhidlərimizdən danışdı və şəhidimizə allahdan rəhmət dilədi.


Tədbirdə şəhidin döyüş yoldaşları, din xadimləri, MN-nin nümayəndəsi, xeyriyyəçi, hər zanman qazilərin, şəhid ailələrinin yanında olan Kamil Zeynallı və "Zefertv.az" xəbər portalının rəhbəri Dəniz xanım Rüzğar da çıxış edərək şəhid Tərlan Məmmədov haqqında danışaraq öz hisslərini tədbirə toplaşanlarla bölüşdülər. Şəhidimizin valideynlərinə, yaxınlarına, qohumlarına səbirli və qürurlu olmaqlarını arzuladılar.


Çıxışlardan sonra balaca fidanlarımız şəhidin bulağı qarşısında Vətənpərvər şerlər söylədilər. Şəhidin adına yazılan mahnı oxundu. Sonda isə "Tərlan bulağı"nın önünə gül-çiçəklər qoyuldu. Tədbir başa çatdıqdan sonra şəhid Məmmədov Tərlanın adına ehsan süfrəsi verildi. Şəhidin bu gün 25 yaşı olacaqdı.

Onu da qeyd edim ki, Azərbaycan Ordusunun əsgəri olan Tərlan Məmmədov 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsi zamanı Füzulinin azadlığı uğrunda gedən döyüşlərdə erməni işğalçılarına qarşı savaşıb. Tərlan Məmmədov oktyabrın 8-də Füzuli döyüşləri zamanı şəhid olub. Abşeron rayonunun Saray qəsəbəsində dəfn olunub.


Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Pespublikası Prezidenti cənab İlham Əliyevin 15.12.2020-ci il tarixli Sərəncamına əsasən Tərlan Məmmədov ölümündən sonra "Vətən uğrunda" medalı ilə təltif edilib.


Azərbaycanın Füzuli rayonunun işğaldan azad edilməsi uğrunda aparılan döyüş əməliyyatlarına qatılaraq şəxsi igidliyi və şücaəti nümayiş etdirdiyinə görə isə Azərbaycan Respublikası Prezidenti cənab İlham Əliyevin 25.12.2020-ci il tarixli Sərəncamına əsasən Tərlan Məmmədov ölümündən sonra "Füzulinin azad olunmasına görə" medalı ilə təltif edilib.

P.S: Bizdə "Qanunyolu.info.az" və "Zefertv.az" xəbər portalı olaraq kollektivimiz adından Şəhid Məmmədov Tərlanın valideynlərənə, qohumlarına, yaxınlarına, dostlarına, döyüş yoldaşlarına dərin hüznlə başsağlığı verib, onlara Allahdan səbr diləyirik.


"ŞƏHİDLƏR ÖLMƏZ, VƏTƏN BÖLÜNMƏZ."!!!