Gündəm
Gündəm / Mədəniyyət
“Pul, yoxsa şərəfin qorunması”: Britaniyada düşünürlər ki, Harri anasına xəyanət edir...
Şahzadə Harri mərhum anasının xatirəsini qorumaqdan imtina edib
“Tac”(Crown) serialının yeni mövsüm çəkilişlərinə başlanmasından sonra şahzadə Harri “Netflix”in 100 milyon funt-sterlinqlik müqaviləsindən imtina etməyə çağırılır. Problem onun anası şahzadə Diananın orada necə təsvir olunmasıdır: Ledi Dinin yaxın rəfiqəsi artıq onun təsvirini hörmətsizlik adlandırıb. Moderator.az “Gazeta.ru”nun Sasseks hersoqunun anasının şərəfini qorumağa niyə tələsmədiyi və serialda nəyin səhv olduğu barədə hazırladığı məqaləni oxucularına təqdim edir.
Sasseks hersoqundan “Tac” filmində anası şahzadə Diananın mübahisəli obrazı ilə bağlı səssizliyini pozması xahiş edilib. Bu təşəbbüs “Harri: Şahzadənin bioqrafiyası” kitabının müəllifi Ancela Levin tərəfindən irəli sürülüb. O, şahzadəni onun üçün nəyin daha vacib olduğuna qərar verməyə çağırıb: keçən il Meqan Markl ilə birlikdə “Netflix” servisi ilə imzaladığınız müqavilə, yoxsa ananızın xoş xatirəsi.
“Harri “Netflix”in serialı haqqında tamamilə susqundur”, - deyə yazıçı “The Sun” nəşrinə bildirib. - O, müqaviləni pozmalı və Diananın müdafiəsinə qalxmalıdır. Daha vacibi nədir: pul, yoxsa ananın şərəfinin qorunması? Onun bu suala cavab tapa bilməməsi təəccüblüdür”.
Kral işləri üzrə ekspertlərin fikrincə, Sasseks hersoqları “Netflix” ilə 100 milyon funt sterlinqlik müqavilənin şərtlərini əvvəlcədən razılaşdırmalı idilər. “Majesty Magazine” jurnalının redaktoru İnqrid Süard isə uzaqgörənliyin Meqan Markl tərəfindən göstərilməli olduğunu deyir və bildirir ki, müqaviləyə platformanın məhsulları haqqında nə düşündükləri barədə açıq fikir söyləyə bilmək bəndini əlavə etməliydilər. Xatırladaq ki, cütlük “Netflix” ilə birlikdə sənədli, bədii filmlər və uşaq proqramları istehsal edən prodüsserlik kompaniyasını yaradıblar.
Həqiqətən də indiyə qədər şahzadə Harri “Tac”ın süjetini izləməyin onun və ailəsi haqqında mediada yazılanlardan daha xoş olduğunu deyirdi. O, bu fikri Ceyms Kordenin axşam şousunun çəkiliş meydançasında bildirmişdi.
Lakin Sasseks hersoqları Diananın “Tac” filmindəki obrazı ilə bağlı səssiz qaldıqca Ledi Dinin dostları narahatlıq keçirirlər.
Uels şahzadəsi Diana və şahzadə Harri Londonda, 1995-ci il
Belə ki, əvvəllər Diananın sirdaşı və indi jurnalist işləyən Cemayma Xan artıq 2020-ci ilin sentyabrından 2021-ci ilin fevralına qədər məsləhətçi kimi çıxış etdiyi serialın titrlərindən adının çıxarılmasını xahiş edib.
Məsələ burasındadır ki, Cemayma Xanla birlikdə Ledi Dinin şahzadə Çarlzdan boşanması, şahzadənin ürək cərrahı Həsnat Xan və iş adamı Dodi Əl-Fayedlə münasibəti, eləcə də onun BBC-də Martin Bəşirə qalmaqallı müsahibəsi haqqında epizodlar işlənib hazırlanıb.
İndi isə Cemayma Xan rəfiqəsinin tarixçəsinə lazımi rəğbət göstərilmədiyini bildirir. “Senarini birgə yazmaq razılığımızın yerinə yetirilmədiyini və müəyyən bir hekayə xəttinin gözlədiyim hörmət və şəfqətlə izah edilmədiyini anlayanda, adımın titrlərdən silinməyini xahiş etdim və mükafatdan boyun qaçırdım”, - deyə o, bu barədə “Sunday Times” nəşrinə məlumat verib.
“Tac” serialının beşinci mövsümü gələn ilin noyabrında ekranlara çıxacaq və Diananın 1997-ci ildə Parisdə avtomobil qəzasında ölümündən əvvəlki həyatının son illərinə həsr olunacaq. Serialda baş rolu 31 yaşlı avstraliyalı aktrisa Elizabet Debiki canlandırıb.
Şəbəkədə son mübahisələrə səbəb də məhz o oldu. Bu günlərdə internetdə baş qəhrəmanın məşhur “intiqam paltarı”nda göründüyü çəkilişdən kadrlar yayılıb. Şahzadə Çarlz evlilikləri dövründə xəyanət etdiyini etiraf etdikdən sonra Ledi Di belə bir paltarda 1994-cü ildə Londondakı “Serpentine” qalereyasında keçirilən “Vanity Fair” şam yeməyində görünmüşdü. Krallıq protokoluna zidd olan yunan markası “Christina Stambolian”ın çiyinləri açıq, dərin dekolteli libası bütün dünya mətbuatında ajiotaj yaratmışdı.
Aktrisa Elizabet Debiki “Tac” serialında şahzadə Diana rolunda
Elizabet Debikinin obrazı çoxlarının xoşuna gəlməyib. “Heç vaxt baxmayacağım bir serial. Aktrisa şahzadə Diananın “qisas paltarında” dəhşətli görünür! Buraxın, Diana dinc yatsın”, “Güclü oxşarlıq var, lakin kostyum ustası Debikinin əynindəki paltarı daha yaxşı oturtmalı idi. Onun uyğunluğu Diananın paltarı ilə müqayisədə çox aşağıdır və prinsip etibari ilə əyninə yaxşı oturmur”, - deyə şəbəkə istifadəçiləri “Twitter”-də yazıblar.
Ancaq başqaları bu obrazın əvvəllər təqdim olunanlardan daha yaxşı olduğunu qeyd edirlər. Yeri gəlmişkən, “Netflix” şahzadəyə münasibətdə “alçaldıcı” adlandırılan “Diana” müziklinin ekranlara çıxmasından sonra daha cox tənqid atəşinə tutulmağa başlayıb.
Mütəxəssislərin fikrincə, kral ailəsinin həyatı ilə bağlı “Tac”ın əvvəlki mövsümləri də personajları yanlış təqdim etdiyinə görə tənqid olunub. Məsələn, Diana mələk, şahzadə Çarlz isə çox qəddar bir ər kimi təsvir olunur. Britaniyanın mədəniyyət naziri Oliver Douden hətta serialın müəlliflərini ekranda həyat yoldaşları arasındakı münasibətlərin real tarixi faktlardan deyil, uydurmalardan ibarət olduğu barədə tamaşaçıları xəbərdar etməyə çağırıb.
Bu arada Britaniya parlamentinin üzvləri Marqaret Tetçerin hekayəsinin təqdimatında qeyri-dəqiqliklər müşahidə ediblər. “Tac”da Britaniyanın baş naziri oğlu Markın yoxa çıxması ilə bağlı Argentina ilə hərbi münaqişəyə başlayır ki, bu da siyasətçilərin fikrincə, “tamamilə cəfəngiyyatdır”. Həmçinin serialda Kamilla Parker-Boulz ilə Uels şahzadəsi arasındakı münasibətdən bəhs edən hekayə çox qalmaqallı şəkildə təqdim olunub.
Tərcümə və təqdim etdi: Miraslan