"Azərbaycan Qarabağdan və Ermənistandan ermənilərin Kəlbəcərdəki "David Vəng" kilsəsinə gəlib ayin keçirməsinə icazə verir”.

Cebhe.info-nun xəbərinə görə, bu barədə Milli Cəbhə Partiyasının sədr müavini, politoloq Məhəmməd Əsədullazadə bildirib:

"Rusiya sülhməramlı qüvvələrinin Kəlbəcərdə, Azərbaycanın nəzarətində olan ərazidə postu götürülməlidir. Bu, ermənilərə xidmət edir. Sülhməramlı qüvvələrinin burada post qurması qanunsuzdur. Hazırda erməniləri Rusiya "sülhməramlı qüvvələri" müşayiət etməklə, birtərəfli olaraq öz missiyalarından kənar addımlar atır. Azərbaycan ümiyyətlə, Ermənistan vətəndaşlarına Kəlbəcərdə, Xocavənddə nəzarətimizdə olan Alban kilsələrinin girişinə icazə verməməlidir”.

Politoloq bildirir ki, Ermənistan və Qarabağdakı ermənilər Şuşadakı kilsəyə gəlmək üçün Rusiya sülhməramlı qüvvələrinə müraciət edib:

"Oradakı sülhməramlı komandanlıq Azərbaycan tərəfi ilə bu barədə danışıqlar aparıb. Təbii ki, Azərbaycan Şuşadakı "Qazançı" kilsəsinə ermənilərin girişinə icazə verməyib. Ermənilərin Kəlbəcər, Laçın və Şuşadakı kilsələrə səfərlər təşkil etməkdə məqsədi bu yerlerin "ermənilərə aid olduğunu" və "Azərbaycan tərəfindən qəsb edildiyini" göstərməkdir. Onların əsas planı budur. Onda belə çıxır ki, Şəkidə, Gədəbəydə qədim Alban kilsələrinə ermənilərin səfərlərini "sülhməramlilar" təşkil etməlidir?! Ona görə də bir daha sülhməramli qüvvələrə ermənilərin bu kimi tələbləri ilə Azərbaycana müraciət etməməsi tapşırığı verməlidir.

Azərbaycan qəti bəyan etməlidir ki, Qarabağdakı qədim Alban kilsələrinin ermənilərə aidiyyəti yoxdur və onların gəlişinə icazə verilməyəcək. Kəlbəcər, Laçın və Xocavənddə nəzarətimizdə olan kilsələrə ermənilərin gəlişinə icazə versək, bu, əleyhimizə işləyəcək.

Bu, ermənilərin növbəti avantürasıdır və bunun dini ayinlə heç bir əlaqəsi yoxdur. Rusiya sülhməramlı qüvvələri də ermənilərin bu avantürist siyasətinə ortaqdır. Prezident İlham Əliyevin Xocavənddə Alban kilsəsinin üzərindən qondarma erməni hərflərinin silinməsini tələb etməsi, ermənilərin bu məkrli planına qarşı sarsıdıcı zərbəsidir”.