ABŞ Senatı hökumətin müvəqqəti maliyyələşdirilməsi ilə bağlı qanun layihəsini dəstəkləyib. Bu, gələn həftə baş verə biləcək şatdaundan qaçmağa kömək edəcək.

"MUMTv.az" xəbər verir ki, "The Hill” qəzetinin məlumatına görə, büdcə qanun layihəsinin lehinə 78 senator, əleyhinə 18 senator səs verib.

Bu gün, sentyabrın 26-da büdcə ABŞ Konqresinin Nümayəndələr Palatası tərəfindən də təsdiqlənib. Sənəd indi imzalanmaq üçün prezident Co Baydenə göndəriləcək.

Bayden ikipartiyalı razılaşmaya görə Konqresin hər iki palatasına təşəkkür edib. "Mənim administrasiyam qanun layihələrinin Amerikanın müdafiəsinə, veteranlara, yaşlılara, uşaqlara və işləyən ailələrə ünvanlanmasını təmin etmək və Amerika xalqının təcili ehtiyaclarını ödəmək üçün Konqreslə işləyəcək”, - Baydenin Ağ Evin saytında dərc edilmiş bəyanatında deyilir.

Nümayəndələr Palatasının spikeri Mayk Conson keçən həftə hökumətin maliyyələşdirilməsini üç ay uzadacaq qanun layihəsi təqdim edib. Cari büdcə sentyabrın 30-da başa çatır. Büdcə ilə bağlı əvvəlki səsvermə cəhdi respublikaçıların xərclərin azaldılmamaması səbəbindən uğursuz olub.