Bern Universitetinin isveçrəli astronomları ilk dəfə olaraq Marsın ekvatorunda buz izlərini müşahidə ediblər. Bu bölgədə donmuş suyun mövcudluğunun günəş enerjisi ilə nazik bir atmosferin birləşməsinə görə qeyri-mümkün olduğu düşünülürdü.

"MUMtv.az" xəbər verir ki, tədqiqat "Nature Geoscience" (NatGeo) elmi jurnalında dərc olunub.

Alimlər bu kəşfi Avropa Kosmik Agentliyinin "ExoMars Trace Orbiter" və "Mars Express" kosmik gəmisindən istifadə edərək ediblər.

Buz izi Günəş sistemindəki ən yüksək zirvənin, 30 kilometrlik Olimpus Monsun yerləşdiyi ən böyük vulkanik bölgə olan Tarsis bölgəsində yerləşir. Onun kalderasında, həmçinin Arsia, Askrey və Ceranius Tolus vulkanlarının boşluqlarında donmuş su tapılıb.

Tədqiqatçıların tapdığı kimi, Mars ekvatorunda buz günəş çıxandan cəmi bir neçə saat sonra yaranır və sonra buxarlanır. Şaxtalı təbəqənin qalınlığı millimetrin yalnız yüzdə birini təşkil edir, lakin şaxtalı ləkələr çox genişdir və təxminən 111 milyon litr su ehtiva edir.

Komanda hesab edir ki, Tarsis bölgəsi üzərində havanın qəribə dövriyyəsi Mars ekvatorunun xarici iqlimi ilə müqayisədə unikal olan kalderalarla mikroiqlim yaradır.

"Küləklər dağ yamaclarına qalxaraq nisbətən nəmli havanı səthdən yüksək hündürlüklərə aparır, orada qatılaşır və şaxta kimi çökür”, deyə tədqiqatın həmmüəllifi Nikolas Tomas izah edib.

Alim əlavə edib ki, komandanın Marsda vulkanların zirvələrində müşahidə etdiyi şaxta kalderanın kölgəli ərazilərində, xüsusən də temperaturun aşağı olduğu bölgələrdə yerləşdiyi görünür.