CBC-nin tanınmış aparıcısı Əsli Nəzərova kanaldan ayrılmasının səbəbini açıqlayıb.

KONKRET.az xəbər verir ki, Əsli Nəzərova özünün facebook səhifəsində bunları bildirib:

"Əziz dostlar, hörmətli tamaşaçılar! Bir çoxunuz mənə yazıb, ekranda gorünməməyimin səbəbini soruşursınız. Hər birinizə diqqətinizə görə sonsuz təşəkkürümü bildirirəm! Sag olun, var olun!

2021-ci ilin 9 fevral tarixindən mən rəsmən CBC kanalından ayrıldım. Təbii ki, kanalda 7 il işlədikdən sonra bu elə də asan deyildi, amma, inanın ki, hərdən şərait o qədər dəyişir, o qədər xoşagəlməz hallar, ədalətsizlik baş verir ki, o zaman düşünürsən – mən burada artıq qala bilmərəm. Son zamanlar CBC telekanalını onlarla işçi tərk edib, və bu da, təbii ki, sevindirici hal deyil.

Lakin, mən onu da qeyd etməliyəm ki, bu illər ərzində beynəlxalq kanalda işləyərkən, yüksək səviyyədə aparılan informasiya müharibəsində mənim də payım olub və buna görə mən çox xoşbəxtəm.

Çox şadam ki, burada işlədiyim illər ərzində qarşıma qoyulan bütün vəzifələrin, verilən tapşırıqların öhtəsindən layiqincə gəlmişəm. Ümumiyyətlə, nə iş görmüşəmsə, Tanrım mənə o işi yüksək səviyyədə görməyi nəsib edib. Bu keçmiş iş yerimdə də belə olub, CBC-də də.

Bütün iş yoldaşlarıma, daha doğrusu keçmiş iş yoldaşlarıma üzümü tutub deyirəm: Dostlar, sizin hər birinizi tanıdığıma görə mən CBC-yə minnətdaram, hamınıza uğurlar arzulayıram.

P.S. İşlə bağlı maraglı təklifləriniz varsa, məmnuniyyətlə qəbul edərəm”.