"Sumqayıt Nəqliyyat” MMC 2016-cı ildə yaradılıb. Nizamnamə kapitalı 50 AZN olan qurum Sumqayıt Şəhər İcra Hakimiyyətinin tabeliyində fəaliyyət göstərir. Vergilər Nazirliyinin reyestr məlumatlarında MMC-nin qanuni təmsilçisi kimi Xannı Rüstəmovun adı qeyd edilib.

Sumqayıt Nəqliyyat MMC-nin yaradılması Zakir Fərəcovun Sumqayıta icra başçısı təyin olunmasından sonraya təsadüf edir. Zakir Fərəcov 2015-ci ilin sentyabrında Sumqayıta icra başçısı təyin edilib. Oktyabr ayında isə "Sumqayıt Nəqliyyat” MMC yaradılıb və Xannı Rüstəmov qurumun rəhbərliyinə gətirlib.

Xannı Rüstəmovun adı bir sıra qalmaqallarda hallanır. Bir müddət əvvəl o, Qarabağ qazilərinə problem yaratmaqda ittiham olunurdu. Bildirilirdi ki, o, qazilərin nəzarətində olan marşrut xəttini ələ keçirib. Qazilər olayla bağlı Prezidentə müraciətlərində yazırdılar: 

"Sumqayıt Nəqliyyat” MMC-nin sədri Xannı Rüstəmov vətənimizin ağır günlərində könüllü olaraq cəbhə bölgəsinə getmiş və orada Sumqayıt şəhərinin adını ucaldaraq torpaqlarımız uğrunda canlarını qurban verən müharibə əlillərinə qarşı xüsusi qəddarlığı ilə fərqlənməkdədir. O, 1998-ci ildən etibarən 11 nəfər Qarabağ əlili və şəhid ailəsi tərəfindən təsis edilmiş və Sumqayıt şəhər əhalisinə nümunəvi xidməti ilə seçilən 2 saylı marşrutun müharibə əlillərinin əlindən zorla almaq üçün tutduğu vəzifəsindən sui-stifadə etməkdədir. Aşkarca rüşvət tələb edən və əlillər tərəfindən ödənilən 4000 (dörd min) manatlıq aylığa qane olmayan bu rüşvətxorun əməlləri nəticəsində müflisləşərək aciz duruma düşmüş Qarabağ əlillərini həyatlarından bezdirməyə nail olub”.

Zakir Fərəcovun müdaxiləsindən sonra Xannı Rüstəmovun qanunsuz əməlləri bir qədər səngimişdi.

Bir neçə gün əvvəl onun ölkədən qaçdığı barədə məlumat yayılıb. Həmin xəbərdə deyilir ki, Xannı Rüstəmovdan bir müddətdir xəbər yoxdur.

Onun çalışdığı MMC-də səlahiyyətlərindən sui istifadə edərək, külli miqdarda vəsaiti ələ keçirdiyi bildirilir. Aparılan araşdırma zamanı məlum olub ki, X.Rüstəmov şəhər ərazisində fəaliyyət göstərən marşrut xəttlərində hər bir nəqliyyat vasitəsindən qanunsuz olaraq vergi toplayıb. Gündəlik sürücülərdən toplanan plan Xannı Rüstəmovun öz qaydalarına görə yığılıb. Bu proses onun fəaliyyəti dövründə, yəni bir neçə il davam edib. X.Rüstəmov topladığı pullarla aradan çıxıb.

"Sumqayıt Nəqliyyat" MMC-dən isə bildirilib ki, Xannı Rüstəmov işində verdiyi nöqsanlara görə vəzifəsindən uzaqlaşdırılıb. Hazırda bununla bağlı araşdırma aparılır.