"MUMtv.az" “Anadolu” agentliyinə istinadən xəbər verir ki, İstanbulda terror aktının təşkilində ittiham olunanları 3000 ildən çox həbs cəzası gözləyir.

İstanbulun 13-cü Cəza Məhkəməsi terror aktını törədən Əhlam əl-Bəşir də daxil olmaqla 36 nəfərin təqsirləndirildiyi iş üzrə ilk məhkəmə iclaslarını mayın 9-10-11-nə təyin edib.

Bundan əvvəl Türkiyə polisi noyabrın 13-də İstanbulun İstiqlal küçəsində törədilən terror aktında əli olmaqda şübhəli bilinərək daha 8 nəfəri saxlayıb.

Qeyd olunur ki, müttəhimlər terrorçulara yardım etməkdə və onlara sığınacaq verməkdə şübhəli bilinirlər. Məlum olub ki, iki məhbus hücumu törədən Suriya vətəndaşı Əhlam əl-Bəşirə Suriyadan qeyri-qanuni yollarla Türkiyəyə daxil olmağa kömək ediblər.

Noyabrın 13-də İstanbulun mərkəzi rayonlarından birində piyadalar üçün nəzərdə tutulmuş İstiqlal küçəsində partlayış baş verib. Türkiyə Ədliyyə Nazirliyi bunun terror aktı olduğunu bəyan edib.

Partlayış nəticəsində 6 nəfər ölüb, 80-dən çox insan yaralanıb.

MUMtv.az
Jalə Asiman