Gündəm
Gündəm / Siyasət
"Qarabağda güllə atana topla cavab verməliyik" - ÇAĞIRIŞ
Dünən Ermənistan silahlı qüvvələrinin bölmələri Azərbaycan-Ermənistan dövlət sərhədinin Qarakilsə rayonunun Noravan yaşayış məntəqəsi istiqamətində yerləşən mövqelərindən Ordumuzun Laçın rayonunun Əhmədli yaşayış məntəqəsi istiqamətində yerləşən mövqelərini müxtəlif çaplı atıcı silahlardan fasilələrlə atəşə tutub.
Bu barədə Azərbaycan Müdafiə Nazirliyindən məlumat verilib.
Qeyd olunan istiqamətdə bölmələrimizin təminat yollarının çəkilməsi məqsədilə yol işləri aparan mülki şirkətə məxsus texnika da atəşə məruz qalıb.
Şirkətin texnikasına zərər dəysə də, xəsarət alan olmayıb. Ermənistan silahlı qüvvələrinin növbəti təxribatlarının qarşısını almaq məqsədilə bölmələrimiz tərəfindən cavab tədbirləri görülüb.
Hazırda əməliyyat şəraitinin bölmələrimizinin tam nəzarəti altında olduğu bildirilib.
Görünür bir tərəfdən sülh danışıqlarını davam etdirən Ermənistan, digər tərəfdən isə təxribatlarını davam etdirir. Hətta onlar yenidən mülki şəxslərə atəş açmağa başlayıblar. Lakin bu təxribatlar ilə danışıqlar formatı bir-birilə ziddiyyət təşkil edir. Dia.az-ın məlumatına görə, Böyük Azərbaycan Partiyasının (BAP) sədri Elşad Musayev Cebhe.info-ya açıqlamasında bildirib ki, ermənilər tərəflər arasında problemin həll olunmadığını dünyaya göstərmək üçün təxribatlardan istifadə edirlər:
“Ermənilər müəyyən təxribatlar törədərək dünyaya problemin həll olmadığını göstərməyə çalışırlar. Ona görə də belə təxribatçı addımlara əl atırlar. Təbii ki, ermənilər addım atdıqdan sonra Azərbaycan Ordusu tərəfindən onlara qarşı əks tədbirlər görülür. Bu növbəti təxribatın qarşısı da misli ilə alınmalıdır. Onların bizimlə nə döyüşməyə gücü, nə də qabiliyyəti var. Ermənistan cəmiyyətinin özündə də əhali demorolizə olunmuş vəziyyətdədir. Orada keçirilən sorğular da onların müharibə istəmədiyini göstərir, çünki qorxurlar. Ümumiyyətlə, ermənilərin belə təxribatları olacaq və biz bunlara hazır olmalıyıq. Amma əsgərlərimizə və ya mülki vətəndaşlarımıza qarşı bir güllə belə atılsa, ona topla cavab verməliyik”.