Mumtv.az Axar.az-a istinadən xəbər verir ki, Çin ərazisindən keçən ən uzun çay olan Yantszı da daxil olmaqla, 433 çayda suyun səviyyəsi təhlükəli həddə çatıb, 33 çayda tarixi rekord səviyyəsinə yüksəlib.

Yantzı çayının hövzəsində yerləşən Çunçin şəhərində və Siçuan vilayətinin bir neçə yaşayış məntəqəsində daşqın sularının hündürlüyü 2 metrə çatıb və irimiqyaslı dağıntılar törədib. Sel və daşqınlar yüzlərlə hektar əkin sahəsini məhv edib, 30 minə yaxın fərdi evə ziyan dəyib. Ümumi maddi ziyan 13 milyard dollara yaxındır. Suların əhatəsində təcrid vəziyyətinə düşən 2 milyondan çox sakinin təhlükəsiz yerlərə təxliyəsi əmr olunub. Ölkənin üçüncü ən böyük şirin su hövzəsi olan Tayhu gölündə suyun səviyyəsi 4,65 metr yüksəlib. Bununla əlaqədar ən yüksək səviyyədə hazırlıq vəziyyəti elan edilib.

Qeyd edək ki, mayın son günlərindən başlayan şiddətli yağışlar 40 milyona yaxın insana müxtəlif səviyyədə zərər vurub. Meteoroloqlar bir neçə çayda sel təhlükəsinin davam etməsi ilə əlaqədar xəbərdarlıq ediblər.