mumtv.az
mumtv.az

"Gəmidən düşməyə qoymurdular" - Dəhşətli yanğından çıxan dənizçi danışır... - FOTOLENT

8-05-2020, 16:39 40 dəfə baxılıb

Aprelin 8-də göyərtəsində 4 azərbaycanlı heyət üzvü olan gəminin Malta sahilində yanması barədə xəbərlər ölkə mediasının gündəminə çevrildi. Onların ölkədən kənarda qaldığı bir ay müddətində demək olar hər gün vəziyyətləri ilə bağlı KİV-də məlumat yayılırdı. Nəhayət, bir aydan sonra "Bellatrix SHİPPİNG LTD”yə məxsus "Bellatrix” gəmisinin azərbaycanlı heyəti – baş köməkçi Cahangir Əzizli, baş mexanik Məcidəli Kərimov, motorçular Kamil Bədəlov və Tələt Cəbrayılovun ölkəmizə gətirilməsi bu gün reallaşıb.
Mumtv.az xəbər verir ki, bir ay əvvəl dənizçilərimizin başına gələn hadisə barədə gəmi kapitanının baş köməkçisi Cahangir Əzizli Lent.az -a hadisənin necə baş verməsindən, xilas olmalarından danışıb:

- Aprelin 8-də gecə saat 03:15-də, İon dənizində, İtaliyanın Siciliya adası ilə Yunanıstan adaları arasında səfərdə olarkən yanğın baş verdi. Yanğın gəminin baca hissəsindən çıxan qığılcımlara görə yarandı. Çox güclü külək olduğundan özümüz söndürə bilmədik. Hadisə zamanı hindistlanlılardan birinin iki barmağı kəsilmişdi. Onu da özümüz müalicə etdik.

"Bizi xilas edən gəminin baş köməkçisi mənim qrup yoldaşım idi”

- Yaxınlıqdan Türkiyə şirkətinin Panama bayrağı ilə üzən "ARİFE” gəmisi keçirdi. Gəmi kapitanının baş köməkçisi həmyerlimiz Ramil Əhmədov bizimlə əlaqəyə çıxaraq, köməyə ehtiyacımız olub-olmadığını soruşdu. Biz də kömək lazım olduğunu dedik. Yanğın güclü olduğundan böyük gəmi ilə yaxınlaşa bilmədilər. Dalğa var idi, gəmi çox tərpənirdi. O da sağ olsun, öz heyətindən bir neçə nəfərlə kiçik qayıqda gəldi və bizi xilas etdi. Gəmidə 12 nəfər idik. Hər dənizçi o küləkli havada gəlib kömək etməzdi. Ramil Əhmədov həm də mənim qrup yoldaşım olub.


"Koronavirusa görə Türkiyəyə ayaq vurmağımıza icazə vermirdilər”

- Aprelin 12-də İzmir limanına gəldik. Ancaq bizi limanda enməyə qoymadılar. Ayın 17-dən mayın 2-dək gəmidə karantində qaldıq. Birinci vitse-prezident Mehriban Əliyevaya, Diasporla İş üzrə Dövlət Komitəsinin sədri Fuad Muradova, Kənan müəllimə təşəkkür edirəm. Onlar Ankara ilə, Türkiyənin Xarici İşlər Nazirliyi ilə əlaqəyə çıxdılar. İzmirdəki konsulumuz Asif müəllim də bizə çox dəstək oldu. Koronavirusa görə heç kim bizi ölkəyə buraxmırdı, qorxurdu. Adlarını sadaladığım adamların sayəsində mayın 2-də, nəhayət, həkimlər bizi yoxlayıb, gəmidən düşməyimizə icazə verdilər. 4 gün Qızlar Universitetinin yataqxanasında karantində qaldıq. Orada hər otaqda bir nəfər olmaqla qalırdıq. Gözəl şərait qurmuşdular, yemək-içməkdən, xidmətdən razıyıq. Çox sağ olsunlar, bizə yaxşı baxırdılar. Bizdən müsahibə götürmüşdülər. Yəqin ki, "TRT” kanalından göstərərlər. Daha sonra İzmirdəki konsulumuz Asif müəllimin və İstanbuldakı konsulumuz Təbriz müəllimin köməyi ilə bizi karantindən növbəsiz çıxarıb ölkəmizə göndərdilər.

Həmsöhbətimiz onları xilas edənlərin Gürcüstanın deyil, Türkiyə gəmisi olduğunu da vurğulayıb:

- Bundan əvvəl bizdən açıqlama almışdılar. Ancaq təəssüf ki, orada bizi xilas edən gəminin Türkiyəyə yox, Gürcüstana məxsus olduğu yazılmışdı. Bunu hətta "Facebook"da da paylaşmışdılar. Qrup yoldaşım, bizi xilas edən Ramil Əhmədov həmin paylaşımı görəndə gülüb ki, niyə məni gürcü etmisiniz.

Cahangir Əzizli hazırda səhhətlərinin normal olduğunu da qeyd edib:

- Gəmi "Bellatrix SHİPPİNG LTD”yə məxsusdur. Boliviya bayrağı altında üzür, sahibi türkdür. Quru yük gəmisidir, tökmə yüklər daşıyırdıq. Heyətimiz 12 nəfərdən ibarət idi. 4-müz azərbaycanlı, 3 nəfər ukraynalı, 1 rus, 1 türk, 3 nəfər də hindistanlı. Hazırda Bakıda Olimpiya şəhərciyində hər otaqda 2 nəfər olmaqla qalırıq. Hər şey əladı, ancaq adam çox olduğu üçün yeməklərimizi və bizə gətirilən siqaretləri gec çatdırırlar./Lent.az/








Mətndə səhv var? Onu siçanla seçin və Ctrl+Enter düyməsini basın.
Teqlər:
ŞƏRH YAZ
OXŞAR XƏBƏRLƏR
XƏBƏR LENTİ
BÜTÜN XƏBƏRLƏR
SƏHİYYƏ
İDMAN
ŞOU-BİZNES
DÜNYA