Xəbər verdiyimiz kimi dünən gecə saatlarında Mingəçevirdə 120 yaşlı qovaq ağacı turist bazasının üzərinə aşıb. Bundan bir müddət öncə isə Şəki Xan Sarayında yaşlı çinar ağacının aşması faciəyə səbəb olmuşdu. Rayonlarımızla yanaşı, elə paytaxt Bakıda da tez-tez ağacların aşdığı ilə bağlı xəbərlər eşdirik. Hər dəfə güclü külək əsəndə ən az 1-2 nəfər aşan ağacın altında qalıb xəsarət alır. 

Bəs paytaxtda qurumuş və yaşlı ağacların müəyyənləşdirilib kəsilməsi işləri aparılırmı? Paytaxtın ağacları qarşıdan gələn payıza hazırdırmı?

Məsələ ilə bağlı Yaşıllaşırma idarəsi üzrə şöbə rəisi Orxan Məmmədov bildirib ki, yalnız müraciət olduqda ağaclar kəsilir:

"Ağacların kəsilməsi istər quru olsun, istər yaş olsun, qanunla tənzimlənir. Qanunda göstərilir ki, Ekologiya və Təbii Sərvətlər Nazirliyinin rəyi nəzərə alınmaqla, istifadə olunan torpaqlarda yerli icra hakimiyyəti və yaxud bələdiyyələrin qərarı əsasında həyata keçirilir. Yəni, nazirliyin rəyini aldıqdan sonra ərazi üzrə rayon icra hakimiyyəti və ya bələdiyyə, yəni torpaq hansı qurumun istifadəsindədirsə, o qərar qəbul eləməli, yaşıllığın götürülməsi vərəqini hazırlamalı və ağacın kəsilməsi üçün müraciət etməlidir".

O.Məmmədov bildirib ki, bu qayda paytaxtla yanaşı rayonlarımız üçün də keçərlidir:

"İstər Mingəçevirdə, istərsə də Bakıda olsun. Bu Nazirlər Kabinetinin 30 avqust 2016-ci ildə qəbul olunmuş qərarıdır. Ağacın kəsilməsi üçün mütləq müraciət olmalıdır. Əgər kəsilibsə də, mütləq ağacın bioloji vəziyyəti ilə əlaqədar ekoloji ekspertiza rəyi olmalıdır”