mumtv.az
mumtv.az

"İran tərəfindən soruşmaq lazımdır ki, səfirinin orda nə işi var?" - deputat

4-08-2021, 11:51

"İran tərəfindən soruşmaq lazımdır ki, səfirinin orda nə işi var?" - deputat

MUMtv.az: -   "İranın Ermənistandakı səfiri Abbas Zohurinin Ermənistan-Azərbaycan sərhədinə səfər etməsi o qədər də təəccüblü deyil. Çünki biz torpaqlarımızın 30 ilə yaxın işğal altında qaldığı müddətdə İranın bu məsələdəki mövqeyinin şahidi olduq. Bu, İranın ilk belə addımı deyil”.

Bu sözləri Demokrat.az-a açıqlamasında Milli Məclisin deputatı Elman Məmmədov deyib.

İran səfirinin təxribatların baş verdiyi Ermənistan-Azərbaycan sərhədinə səfər etməsi barədə danışan deputat İranın Azərbaycanla münasibətlərdə səmimi olmadığını bildirib:

"Mən bu fikirlərimlə Azərbaycan və İran dövlətləri arasındakı münasibətə soyuqluq gətirmək fikrində deyiləm, sadəcə həqiqəti dilə gətirirəm. Azərbaycan həmişə İranla bağlı ən yüksək fikirdə olmuşuq, bu barədə dövlət başçımız da fikrini bəyan edib. İran bizim qonşu, dost ölkəmizdir və biz səsləndirdiyimiz bu fikirlərdə hər zaman səmimi olmuşuq, bu gün də səmimiyik. İranda 30 milyondan çox azərbaycanlı yaşayır. Buna görə də, qonşu, eyni dindən olan dövlət kimi İranla münasibətlərimiz hər zaman yaxşı olsun. İran da oxşar fikirlər səsləndirir, Azərbaycanla dost olduqlarını bildirirlər, amma sözdə deyirlər, fəaliyyətdə səmimi deyillər. Səmimi olmadıqlarını 30 il ərzində görmüşük, bu gün də görməkdəyik. 30 il ərzində İran bir növ Ermənistanın təchizatı, qida borusu rolunu oynadı. Ermənistanda çatışmayan nələr vardısa, İran tərəfindən təmin olunurdu və ya üçüncü dövlət tərəfindən İran ərazisindən çatdırılırdı. Hətta 44 günlük Vətən müharibəsi dövründə də bunun şahidi olduq, İran ərazisindən başqa dövlətlərin hətta silah-sursatı Ermənistana çatdırılırdı.

İranın Azərbaycana münasibətində digər bir məqam işğaldan azad edilən ərazilərlə bağlıdır. Həm İran, həm digər dövlətlər, beynəlxalq təşkilatlar, həm də jurnalistlər, ictimaiyyət keçmiş işğalda olan ərazilərin hansı vəziyyətdə olduğunu yaxşı bilir. Hər şey sökülüb, xaraba qoyulub. Yaxşı, bəs həmin söküntü-tikinti materialları hara göndərilib? Ermənistanda bu müddətdə böyük tikinti işləri aparılmayıb, qonşu dövlətlərdən Gürcüstan və Türkiyəyə aparılmayıb. Geriyə təkcə İran qalır, bütün o tikinti materialları İrana daşınıb”.

İranın Ermənistandakı səfirinin addımını pisləyən deputat bu məsələnin araşdırılmalı olduğunu vurğulayıb:

"Digər tərəfdən, Ermənistan və İran arasında olan görüşlər, müqavilələr, əməkdaşlıq hər zaman bilinib və gizlədilməyib. İndi də İranın bu məsələdə mövqeyi bizə qarşı o qədər də ürəkaçan deyil. İndi İran səfərinin hansı məqsədlə Ermənistan-Azərbaycan sərhədinə, xüsusilə son zamanlarda ermənilər tərəfindən təxribatlar törədilən yerə getməyi araşdırılmalıdır. İran tərəfindən soruşmaq lazımdır ki, səfirinin orda nə işi var? Nə üçün, hansı səbəblə ora getmisən? Ora ABŞ səfiri səfər etmişdi, ora Fransa səfiri getsə, bu, təəccüb doğurmaz, çünki bu iki ölkənin bizə qarşı mövqeyi bəllidir. Yaxşı bəs sən niyə getmisən ora? Sən Azərbaycana dost, qardaş ölkə deyirsən, amma təxribatların baş verdiyi yerə gedib guya müşahidə aparırsan. Fikirləşmirsən ki, sən İran İslam Respublikasının səfirisən, sən müsəlmansan? Hamı yaxşı bilir ki, ermənilər İslam dininə aid olan yerləri murdarlayıb. Sən hansı əqidə, məzhəblə Ermənistan-Azərbaycan sərhədinə səfər edirsən? İran səfirindən soruşmaq lazımdır ki, bütün bunlardan sonra etdiyi hərəkətdən heç utanmırmı? Düşünürəm ki, Azərbaycan digər ölkələrin münasibətləri barədə ciddi düşünməlidir. Çünki boğazdan yuxarı deyilən ifadələr əməldə özünü təsdiq etmir”.







Mətndə səhv var? Onu siçanla seçin və Ctrl+Enter düyməsini basın.
Teqlər:
ŞƏRH YAZ
OXŞAR XƏBƏRLƏR
XƏBƏR LENTİ
BÜTÜN XƏBƏRLƏR
SƏHİYYƏ
İDMAN
ŞOU-BİZNES
DÜNYA