Gündəm
Gündəm / Sosial
"Mədəniyyət Nazirliyi nə iş görür, hər şeyi elə Prezident etməlidir?" - ÇAĞIRIŞ
Mumtv.az: - Xalq şairi Vahid Əziz Moderator.az-ın redaksiyasına zəng vuraraq maraqlı təkliflə çıxış edib. V.Əziz təklif edib ki, Hərbi Qənimətlər Parkının yanında şəhidlərimizin heykəllərini qoruyub saxlamaq üçün bir muzey də tikilsin:
"Sosial şəbəkədə gördüm ki, Təbriz adlı bir gənc Milli Qəhrəman Polad Həşimovun çox gözəl heykəlini yaradıb. Mənə belə gəlir ki, Azərbaycanda heykəltaraşlıq, rəssamlıq sənətinin inkişafı, vətənpərvərlik tərbiyəsi və şəhidlərimizin xatirəsini yaşatmaq üçün Hərbi Qənimətlər Parkına yaxın bir yerdə Milli Qəhrəmanlarımızın xatirəsini əbədiləşdirən heykəlləri, rəsm əsərlərini saxlamaq üçün bir qalareya yaratmaq lazımdı. Bu gün Azərbaycanda Rəssamlıq Akademiyası var və mən bir neçə dəfə orda olmuşam. İnandırım sizi, orda elə gözəl heykəllər var ki, adam heyran olur. Bunları Bakı şəhər İcra Hakimiyyəti Mədəniyyət Nazirliyi ilə birlikdə götürüb şəhəri bəzəsinlər də. Nə qədər şəhərdə beton evlər tikmək olar. Bununla rəssamlıq sənəti inkişaf edər, vətənpərvərlik hissi yüksələr və şəhid ailələri də təsəlli tapar. Bir də görürsən şəhid anası xahiş edir ki, mənim də balamın şəklini paylaşın. Bunu etsinlər də, Mədəniyyət Nazirliyi nə iş görür?! Hər şeyi elə Prezident etməlidir? Niyə bunlarda təşəbbüskarlıq yoxdu?! Hanı bu məmurların vətənpərvərlik təşəbbüsü?! Vətənpərvərlik mahnı qoşmaqla, şeir yazmaq deyil. Əgər Qarabağın azad olunması şeir yazmaqla həll olunsaydı, bizdən çox şeir yazan olmayıb. Ən yaxşı şeiri İlham Əliyev, bizim ordumuz, şəhidlərimiz yazdı. Ədəbiyyat da işin bir tərkib hissəsidir. Hər bir şəhid övladı görməlidir ki, atası yaddan çıxmır, həmişə xatırlanır. Vətəndaş bilməlidir ki, o, vətən yolunda şəhid olandan sonra onun ailəsinə baxılacaq. Dövlətimiz bu istiqamətdə xeyli işlər görüb. Həmin muzeyə həmçinin qəhrəmanlarımıza həsr olunmuş bədii əsərlər, teatr sənətinin tamaşasından olan şəkillər də daxil edilməlidir”.//dia.az
