Türkiyənin Qarabağda hərbi varlığı təmin olunmalıdır: "Moskva bunu da qəbul etmək məcburiyyətində qalacaq”
Bu günlərdə Türkiyə Prezidenti Rəcəb Tayyib Ərdoğanla rusiyalı həmkarı Vladimir Putin arasında telefon danışığı olub. Tərəflər bir çox məsələləri, o cümlədən Ukraynadakı durumu, Montrö razılaşmasını və koronavirus peyvəndini müzakirə ediblər. Həmçinin liderlərin iki ölkə arasındakı əlaqələri inkişaf etdirəcək mövzular barədə müzakirə apardıqları vurğulanıb.

"Atlas” Araşdırmalar Mərkəzinin rəhbəri, politoloq Elxan Şahinoğlu sözügedən telefon danışığı barədə fikirlərini "Sherg.az”la bölüşdü:

"Rusiya prezidenti Vladimir Putinin türkiyəli həmkarı Rəcəb Tayyub Ərdoğana zəng edib bir gün əvvəl Ermənistanın baş naziri Nikol Paşinyanla görüşü barədə onu məlumatlandırması və Cənubi Qafqazda kommunikasiya xətlərinin açılması zərurətini bildirməsi təsadüfi deyil. Bu, Kreml sahibinin Türkiyənin bölgədəki varlığını qəbul etməsinin daha bir göstəricisidir. Kreml Türkiyənin Cənubi Qafdazda və Azərbaycanda möhkəmlənməsi amilini qəbul edib. Növbəti mərhələ Türkiyənin Qarabağda hərbi varlığını təmin etməkdir. Moskva bunu da qəbul etmək məcburiyyətində qalacaq”.