Gündəm
“Bələdiyyələrin yerli icra hakimiyyəti orqanlarından asılılığı aradan qaldırılmalııdr” - deputat
"Bələdiyyələrin real vəziyyətini bilmək üçün onların təmsilçilərini dinləmək lazımdır”
Millət vəkili Əli Məsimli bunu Milli Məclisin martın 9-da keçirilən plenar iclasında Bələdiyyələrin fəaliyyətinə inzibati nəzarəti həyata keçirən orqanın illik məruzəsi müzakirə olunan zaman bildirib.
Əli Məsimli bələdiyyələrlə bağlı durumdan bəhs edərkən bildirib ki, "bələdiyyələrin real vəziyyətini bilmək üçün onların təmsilçilərini dinləmək lazımdır....Bələdiyyələrin dinlənilməsi nəticəsində bu sahədə nə qədər problem olduğunu və qarşıda duran vəzifələri daha yaxından öyrənmək olar”.
Əli Məsimli öz çıxışında xüsusi vurğulayıb ki, bələdiyyələrin əsas problemlərindən biri yerli icra hakimiyyəti orqanlarından asılılığıdır. Deputatın sözlərinə görə, bu asılılıq aradan qaldırılmadığı müddətdə bələdiyyələrin səmərəli fəaliyyətindən söhbət gedə bilməz.
Əli Məsimli həmçinin qeyd etdi ki, bələdiyyə mülkiyyəti ilə bağlı problemlərin həllinin çözülməsi də çox vacibdir:" Kadastr sənədləri işlənən zaman alınan dövlət rüsumu çox olduğundan bələdiyyələr bu rüsumları qarşılaya bilmirlər. Ona görə də yaxşı olardı ki, bu məsələ ölkə üzrə bir dəfəlik həll olunardı.Çünki, bələdiyyə torpaqlarının kadastr sənədi olmadığından əkin sahələrinə görə dövlət tərəfindən verilən subsidiyaları ala bilmirlər.”
Deputat bildirdi ki,digər bir məsələ örüş sahələri ilə bağlıdır. Faktiki olaraq əksər bələdiyyələr örüş sahələrinə özləri nəzarət edə bilmir, ayrı-ayrı yüksək vəzifəli şəxslər bu sahələri zəbt edib.Belə vəziyyət heyvandarlığın inkişafına ciddi maneədir. Bu tendesiyayanın qarşısı alınmali, qanunvericiliyin tələbinə müvafiq qaydada örüş sahələrində yalnız onun ümumi sahəsinin 3%-i həcmində yemlik arpa əkilməsinə yol verilməli və həmin sahələrin öz təyinatına görə dolğun şəkildə istifadəsi təmin edilməlidir.