Yeni Azərbaycan Partiyasının bu gün növbədənkənar qurultayının keçiriləcəyi gözlənilir. Pandemiya səbəbindən qurultayın "ZOOM” proqramı vasitəsilə, yaxud da partiyanın İdarə Heyəti ilə Siyasi Şurasının genişləndirilmiş toplantısı formatında baş tuta biləcəyi ehtimalları daha çoxdur.

Bu məlumat yayıldığı gündən ölkə gündəmini zəbt edib. Maraqlısı odur ki, hakim partiya tərəfindən son günə qədər bu xəbərlərə rəsmi reaksiya verən olmadı. Təkzib yoxdursa, demək, xəbərlərin gerçəklik faizi çoxdur.

Bu mövzuda artıq xeyli şərhlər və təhlillər var. Xəbərlərə görə, qurultayda iştirak edəcək nümayəndələrə, YAP üzvlərinə bu haqda bildirilib, məlumatlar verilib və onlar partiyanın mərkəzi qərargahına dəvət olunublar. O iddialar da səslənirdi ki, partiyanın rayon və şəhər təşkilatlarının sədrləri, o cümlədən İdarə Heyəti və Siyasi Şuranın üzvləri martın 4-nə, yəni qurultaydan bir gün öncəyə partiyanın mərkəzi qərargahına dəvət olunublar. Onlardan COVİD-19-la bağlı analizlərin götürüləcəyi, test müayinəsindən keçiriləcəkləri bildirilirdi.

Bu və ya digər xəbərlərə aydınlıq gətirmək üçün YAP qərargahına yollandıq. Lakin çəkilişimizə icazə verilmədi, suallarımıza da cavab verən tapılmadı. Amma bununla belə, YAP-da martın 4-də koronovirusla bağlı analiz verilmə prosesinin olduğunu öyrənə bildik.

Ümumiyyətlə, hakim partiyanın qurultayı ətrafında əsas suallar YAP-ı kimlərin tərk edəcəyi, yaxud kimlərin uzaqlaşdırılacaqları yönündə idi. Kimlər getməlidir, kimlər qalmalıdır sualları ətrafında da az müzakirələr getmir. Çoxları partiya rəhbərliyində təmsil olunan yaşlıları, eləcə də sabiq məmurları gənclərin əvəzləyəcəyini iddia edirdi.

Qeyd edək ki, qurultay ərəfəsində bir sıra müxalifət partiyaları YAP-a birləşmək barədə qərar qəbul edib.

Belə qərar verənlərdən biri Milli Qurtuluş Partiyasıdır. Partiya özünün V qurultayını (pandemiyaya görə online formada) keçirib, şəhidlərin, partiyanın qurucusu və ilk başqanı, Milli Azadlıq Hərəkatının liderlərindən olan mərhum Məhəmməd Hatəmi Tantəkinin xatirələrini bir dəqiqəlik sükutla yad edib. İndiki başqan Vüqar Oruc partiyanın fəaliyyətinə xitam verilməsi və kollektiv şəkildə YAP-a birləşməsi təşəbbüslə çıxış edib.

Təklifini əsaslandıran başqan qeyd edib ki, Milli Qurtuluş Partiyası ideoloji dəyərlərlə silahlanan partiya olub və torpaqlarımızın düşmən tapdağından azad olunması, instusional və idarəetmə sistemində köklü islahatların aparılması istiqamətində ardıcıl fəaliyyət göstərib: "44 günlük Vətən müharibəsi zamanı Azərbaycan Ordusu Ali Baş Komandan İlham Əliyevin rəhbərliyi altında böyük tarixi uğura imza atdı. Prezidentin əzmkarlığı, iradəsi, şəhid və qazilərimizin canı-qanı bahasında biz bu qələbəni əldə etdik. Bu qələbə ilə dövlət kimi, bir daha bütün dünyada özümüzü təsdiq etdik. Üzərimizdə olan ləkəni sildik. Biz tarixi Zəfər qazandıq”.

"Uzun illərdir idarəetmə sistemində ishalatların həyata keçirilməsini tələb edirdik” deyən V.Orucun sözlərinə görə, bu gün hakimiyyətin bütün qollarında - icraedici, qanunverici, məhkəmə sistemində dərin islahatlar həyata keçirilir: "Prezident İlham Əliyev və Birinci vitse-prezident Mehriban Əliyeva ölkəmizin inkişafı naminə ortaya ciddi siyasi iradə qoyublar və bu bizim maraqlarımıza tam uyğundur".

V.Oruc qeyd edib ki, müasir şəraitdə yenilənən Yeni Azərbaycan Partiyası ilə Milli Qurtuluş Partiyasının strateji məqsədləri eynidir və vacib hədəflər uğrunda dağınıq deyil, birgə fəaliyyət daha məqbuldur. Məsələ səsə qoyulub və partiya üzvləri yekdilliklə Milli Qurtuluş Partiyasının kollektiv şəkildə Yeni Azərbaycan Partiyasına qoşulması ilə bağlı qərar qəbul ediblər.

Bundan əvvəl isə Yurddaş Partyası YAP-a birləşmək barədə qərar qəbul edib. Yurddaş Partiyası bir vaxtlar müxalifətdə idi, partiyanın rəhbəri, keçmiş deputat Mais Səfərli bir neçə ay əvvəl koronavirusdan vəfat edib.

Bildirilir ki, ən azı daha 3 partiya da YAP-a qoşulmaq barədə qərar verib.

YAP-ın qurucularından sayılan, Xızının keçmiş icra başçısı, sabiq deputat Maksim Musayev sərt danışdı: "Bizim nizamnamədə belə bir şey var ki, qurultay çağırmaq üçün rayon təşkilatlarında konfranslar keçirilməlidir. Həmin təşkilatlar da qurultaya nümayəndə göndərirlər. Bundan sonra qurultay keçirilə bilər. Həmin nümayəndələrin iştirakı ilə Mərkəzi Aparat, Siyasi Şura və İdarə Heyəti formalaşır. Amma indi eşitməmişəm ki, hansısa rayonda qurultaya nümayəndə seçsinlər. Baxmayaraq ki, Səbayel təşkilatındayam, ildə 3-4 dəfə də gedib üzvlük haqqı verib gəlirəm. Qurultay söhbətlərini orada da eşitməmişəm. Digər tərəfdən, YAP-ın ”Yeni Azərbaycan" qəzeti var. Həmin qəzetdə yəqin ki, məlumat olmalı idi. Amma buna hələ rast gəlinməyib. Eyni zamanda YAP-ın katibliyi bu barədə elan verməlidir. Katibin də Əli Əhmədov olduğunu bilirsiniz. O, baş nazirin müavinidir, dərman satmaqla məşğuldur, bir sözlə, tibb məsələləri ilə məşğul olur. Ümumiyyətlə, onun hansı sahə ilə məşğul olduğunu bilən yoxdur. O, üzə çıxıb deməlidir ki, YAP-ın qurultayı martın 5-də olacaq, yaxud bu barədə yayılan məlumatlar səhvdir. Bu balaca partiya deyil. Məni YAP-a yaxın buraxmırlar. Bilirlər ki, gedən kimi sərt tənqid edəcəyəm. Talançıları partiyada saxladıqlarını deyəcəm, rüşvətxorları nə üçün müdafiə etdiklərinin hesabını soracağam. Partiya ilə yaxın olmadığım üçün də qurultay barədə məlumatsızam. Amma bir daha deyirəm ki, belə bir şey olarsa, bu barədə əvvəlcədən YAP-ın icra katibi, yaxud da partiya sədrinin müavinlərindən biri çıxıb deməlidir ki, belə qeyri-rəsmi xəbər yayılıb, qurultay olacaq, yaxud olmayacaq".

M.Musayev hakim partiyanın Siyasi Şurasını sərt tənqid etdi: "Həqiqətən də YAP-ın Siyasi Şurasında lazımsız, partiyada xidməti olmayan, partiya yolunda çalışmayan, Heydər Əliyev siyasətinə adekvat olmayan insanlar var. Onlar haradansa gəlib öz məqsədlərinə nail olmaq üçün partiyanın biletini bankomat kartı kimi istifadə etməyə çalışanlardır. Onsuz da qurultay olsa, mənim kimilər, yəni YAP-ı yaradanlar ora dəvət olunmayacaqlar. Çağırsalar da, bir az loyal adamlar çağıracaqlar. Hakim partiyanın qurucuları olaraq bizlər arasında çox yaxın əlaqələr mövcuddur. Tez-tez zəngləşirik, görüşürük, siyasi vəziyyəti təhlil edirik. Mövcud vəziyyətin hakimiyyətlə uyğunlaşdığını müqayisə edirik. Eyni zamanda çox narahat olduğumuzu bir-birimizlə bölüşür və təəssüflənirik ki, yaratdığımız partiya niyə bu günə düşüb”.

Sabiq deputat YAP-ın gəncləşəcəyi yönündə səslənən iddialara da toxundu: "YAP-dakı gənclərin siyasi səviyyəsinə, ondan sonra Vətənə vurğunluq səviyyələrinə, millətə xidmət etmək bacarıqları səviyyəsinə bələd deyiləm. Bilmirəm orada sadaladıqlarıma uyğun gənclər varmı. Əgər türmədə yatan sabiq məmurların yetişdirdikləri gənclərdirsə, bu barədə söz deməyə çətinlik çəkirəm. Amma gənclər alın təri, halal zəhmətləri ilə partiyaya giriblərsə, yəni soxulmayıblarsa, gəncləşmə mütləq olmalıdır. İlk növbədə, gəncləşmə Yeni Azərbaycan Partiyasında olmalıdır. Gənclərin ən yaxşılarını, yaxşıların ən elitini seçmək lazımdır. İndi belə gənclərin olub-olmadığını söyləyə bilmərəm”.

Müsahibimiz sonda YAP-dan kimlər getməli, kimlər qalmalıdır kimi suallara bu cür mövqe sərgilədi: "Mən bu barədə fikir söyləməyəcəm. Çünki bunu hər kəs, xüsusilə YAP-a rəhbərlik edənlər çox gözəl bilirlər. Lazım gəlsə, gələcəkdə deyə bilərik ki, bu seçim düzdür, yaxud səhvdir, bu seçimdə ədalətlilik varmı, bu seçim Azərbaycana xeyir verəcək ya yox? Amma onu deməyi vacib bilirəm ki, əvvəlki qurultaylarda çox böyük səhvlərə yol verilib. Bu səhvlər gərək heç olmasa, bu dəfə buraxılmasın”.

YAP Səbayel rayon təşkilatının sədri, sabiq deputat Şəmsəddin Hacıyev də qurultaydan sonra partiyada struktur dəyişikliklərinin ola biləcəyini istisna etməyib: "Yeni tələblər mövcuddur. Dünya dəyişir. Ölkəmizdə cənab Prezidentin başçılığı ilə islahatlar həyata keçirilir. Yeni Azərbaycan Partiyasında da islahatların aparılması nörmaldır”.

Yeri gəlmişkən, növbədənkənar qurultayı labüd edən digər səbəbləri də unutmaq olmaz: partiyanın üzvü olan bəzi icra başçıları, onların müavinləri olan YAP-ın rayon təşkilatının sədrləri, digər vəzifəli şəxslər həbs ediliblər, barələrində Cinayət Məcəlləsinin vəzifə səlahiyyətlərindən sui-istifadə, rüşvət alma və digər maddələrlə cinayət işi açılıb.

"Hamısı partiyadan çıxarılacaq!” - Partiyanın mətbuat katibi Hüseyn Paşayev bu yaxınlarda Modern.az-a həmin şəxslər, o cümlədən korrupsiya ittihamı ilə həbs olunan keçmiş əmək və əhalinin sosial müdafiəsi naziri Səlim Müslümov barədə danışarkən belə demişdi. Qeyd edək ki, YAP-ın Siyasi Şurası 84 nəfərdən ibarətdir. Siyasi Şura üzvlərinin 20-si həm də İdarə Heyətinin üzvləridir.
"Yeni Müsavat”