Saatsaz Hacı Fətəliyev moderator.az-ın suallarını cavablandırıb.

– Saatsaz Hacı Fətəliyev necə oldu ki, birdən-birə məşhurlaşdı?

– Mən 1994-cü ilin aprel ayında Bakıya gəlmişəm. O vaxt məni tanıyan yox idi. "Tarqovu”da bir mağazanın içində saatsaz yeri götürdüm, başladım saatları təmir etməyə. Elan da yazdım ki, düzəlməyən saatları təmir edirəm. Daha sonra geriyə işləyən saat düzəltdim. O vaxt bu cür şeyləri heç kim normal qəbul edə bilmirdi, etmirdilər də. Mənə qəribə baxırdılar. Məhz bu cür işlər məni yavaş-yavaş məşhurlaşdırdı.

– Siz həm də cənab prezidentlə görüşmüsüz. Istərdim bu görüşünüzdən danışaq.

– Mən İlham Əliyevlə ilk dəfə 2004-cü ilin aprelin 2-də görüşmüşəm. 3 dəfə görüşüm olub. Sonuncu görüşümüz 2009-cu ildə baş tutub. Ondan sonra "Tarqovu”ya gəlməyib, görməmişəm. Məni gördü, yanına çağırdı. O vaxt da Tarqovuda binaları təmir edirdilər. Mənə dedi ki, "Görürsüz də biz buraları yaradırıq, abadlaşdırırıq”. Dedim ki, siz Azərbaycanın çiçəklənməsi üçün əlinizdən gələni edirsiz, sizə əminik, bu yolda sizi dəstəkləyirik”.

– Bu təsadüfi görüş idi. Qismət Allahdandır.

– Cənab prezident sizdən nə soruşdu?

– Məndən hal-əhvalımı soruşdu və işimi xəbər aldı. Mən prezidentdən xahiş etmişdim ki, oğlumu Dövlət Yol Polisinə işə düzəltsin, sağ olsun tapşırıq verdi, oğlumu işə düzəltdilər. Bakı Şəhər Dövlət Yol Polisi idarəsində alay komandiri Rəşadət Babayev və idarənin rəisi Nuşirəvan Səfərov oğluma göz verdi, işıq vermədilər. Onu 1 il gecə növbəsinə təyin etdilər. Adi çay içməyə gedəndə ona töhmət vermişdilər. Sən demə onlar bu töhmətləri yığırmışlar ki, onu işdən çıxartmağa əllərində əsas olsun. Bu iki şəxs mənim oğlumu işdən çıxartdı. Hansı ki, bunu mən cənab prezidentdən xahiş etmişdim. Hətta mən bu xahişimi edəndə Vaqif Axundov dedi ki, cənab prezident bəlkə götürək prezidentin mühafizəsində olsun? Mən razılaşmadım və dedim ki, o yol polisində işləmək istəyir. Onlar mənim oğlumun istəyini gözündə qoydular. Bu bir paxıllıq idi. Yəqin ki, cənab prezident bilmir ki, oğlumu onlar işdən uzaqlaşdırıblar. Bu bizə qarşı böyük haqsızlıq idi. Allah onların bəlasını versin, verdi də. Onlar mənim oğlumu işdən çıxartdılar, Allah da onları biabırçılıqla işdən uzaqlaşdırdı.

– Sizin emalatxananı həm də fotosərgi salonunu bənzədirik. Demək olar ki, bütün məşhurlar sizin bu kiçik emalatxananızda olub..

– Mən bu sənətimlə nəin ki, Azərbaycanda, hətta xarici ölkələrdə tanınmışam. 2015 ci ildə İtaliyanın Milan şəhərində əl işlərim nümayiş olunub, mən 2-ci yerə çıxmışam. Bir çox dünya ölkələrindən mənə orada yaşamağa dəvətlər olub, amma öz ölkəmi qoyub heç vaxt getməyi düşünməmişəm. Dünyada elə bir saat yoxdur ki, mən onu düzəldə bilməyim. Bəzən mənə deyirlər ki, Hacı sən olmasan, bu işləri kim edər?

– Neçə nazirin yaxud dövlət adamının saatını düzəltmisiz?

– Keçmiş baş nazir Novuz Məmmədovun saatlarına həmişə mən baxırdım. Abas Abbasovun, Abid Şərifovun saatını da düzəltmişəm. Hamısı da hər zaman razılıq edirdi. Bu gün də çox ziyalı və vəzifəli şəxslərin saatlarına baxıram. Bəzən elə olur ki, çoxu demir ki, kimin saatıdır, gətirirlər ki, baxın.

– Ən bahalı saat kimin olub?

– Çox olub. Misal üçün deyim ki, müğənni Cavanşir Məmmədovun 40 minlik saatını düzəltmişəm.