Dövlət Sərhəd Xidməti (DSX) tərəfindən dövlət sər­hədi­­nin etibarlı mühafizəsinin təmin edilməsi, narkotik vasitələrin və psixotrop maddələrin qanunsuz dövriy­yəsinə qarşı mübarizə tədbirləri davam etdirilir.

DSX-nin Mətbuat Mərkəzindən "Report"a bildirilib ki, sentyabrın 2-də Dövlət Sərhəd Xidmətinin Sərhəd Qoşunlarının "Göytəpə” sərhəd dəstəsinin Biləsuvar rayonu ərazisində yerlə­şən sərhəd zastavasının xidməti sahəsində sərhəd naryadı tərəfindən İran İslam Respub­lika­sın­dan Azər­baycan Respub­lika­sı istiqamətində iki nəfərin dövlət sərhədini pozması müşahidə olunub.

Sərhəd zastavası "həyacan” komandasına qalxaraq xidməti ərazidə sərhəd axtarışı həyata keçirilmiş, nəticədə sərhəd pozucularından biri - Azər­bay­can Respub­lika­sı vətən­­daşı, Biləsuvar rayonunun Əsgərabad kənd sakini, 1991-ci il təvəllüdlü İsmayılov Adil Totuxan oğlu üzərində 3 kq 265 qram heroinə, 3 kq 180 qram tiryəkə, 135 qram marixuanaya oxşar narkotik maddələr, 500 ədəd "Metadon”, 100 ədəd "Glibotex”, 210 ədəd "Gabaprel” psixotrop və güclü təsirli dərman preparatları ilə saxlanılıb.

Hadisə yerindən qaçmış digər sərhəd pozucusunun şəxsiyyəti dəqiq­ləş­dirilərək ­DİN Biləsuvar rayon polis şöbəsi ilə birgə keçirilmiş əməliy­yat-axtarış tədbirləri nəticəsində Biləsuvar rayonunun Əsgərabad kənd sakini, 1990-cı il təvəllüdlü Rəmiyev Musa Adıgözəl oğlu rayon ərazisində polis əməkdaşları tərəfindən 315 qram heroinə, 8 kq 225 qram tiryəkə, 2 kq 310 qram metafetaminə oxşar narkotik maddələrlə, 460 ədəd psixotrop və güclü təsirli dərman preparatları ilə saxla­nıl­ıb.

Fakt üzrə əməliyyat-istintaq tədbirləri davam etdirilir.