“29 oktyabrdan bəri plastik cərrahiyyə mövzusunda araşdırmalar aparıram. Azərbaycanda plastik və estetik cərrahiyyə sahəsində baş verən vəziyyəti diqqətlə öyrənirəm və hər kəsə tövsiyə edirəm. Əgər gəncsinizsə, ciddi ehtiyac yoxdursa, ucuzluğa qaçıb, əməliyyata tələsməyin”.

"MUMTv.az" Musavat.com-a istinadən xəbər verir ki, bu sözləri ABŞ-də yaşayan jurnalist Qənirə Ataşova sosial media hesabında yazıb.

O, plastik-cərrahiyyə mövzusunda araşdırmaları zamanı yaşadıqlarından bəhs edib:

“Yaş və ehtiyac olanda gedin. Mən də lazım gələndə müdaxiləni inkar etmirəm. Hətta gələcək üçün baxdığım həkimlərimiz də var. Demək istəyirəm, həkiminizi yaxşıca araşdırın, onun peşəkarlığından və təcrübəsindən tam əmin olun.Təəssüf ki, çoxunun məni dinləmədiyini görürəm.Məsələn, ölkəmizdə elə klinikalar var ki, xəstə üçün cəhənnəmə çevrilib. Bu yerlərdə diplomları tanınmayan bir çox “həkim”lər fəaliyyət göstərir və təəssüf ki, insanlarımız bu məkanlarda hələ də əməliyyat olurlar. TikTok platformasında aktiv deyiləm. Deyirlər ki, TikTok-da bu cür əməliyyatlar daha çox təbliğ olunur, amma inadla TikTok-a gəlmək fikrim yoxdur. Öz “Instagram” hesabım vasitəsilə bacardığım qədər maarifləndirici məlumatlar paylaşmağa davam edəcəyəm. Lakin inanın, çox yorulmuşam. Təkəm, onlar çox. Hələ üstəlik, yanımda Rusiyadakı mafiya babalarının adını çəkib qorxudanlar da var, kimisi də məni Putinlə qorxudur.

Bir məsələni də qeyd etmək istəyirəm. Hətta ən peşəkar həkimlərin əlində belə bəzən problemlər yaşana bilər. Buna görə də ehtiyatlı olmaq vacibdir”.