DANX: Tezliklə respublikada taksi fəaliyyəti üzrə sahibkarlarla bağlı vəziyyət, onların sayı elektron baza şəkilində Daxili İşlər Nazirliyinə təqdim ediləcək
Xəbər verdiyimiz kimi, Prezident İlham Əliyev "Azərbaycan Respublikası regionlarının 2019-2023-cü illərdə sosial-iqtisadi inkişafı Dövlət Proqramı”nın icrasının birinci ilinin yekunlarına həsr olunan konfransda çıxış edərkən regionlardakı nəqliyyat sistemi, sərnişin daşımalarla bağlı vəziyyətin bərbad olduğunu deyib: "Onların istifadə etdikləri avtobuslar artıq çoxdandır yararsız vəziyyətə düşüb. Ona görə məsuliyyətli sahibkarlar dərhal bu işlərlə məşğul olmağa başlayıblar. Əminəm ki, bundan sonra da həm özəl qurumlar, həm dövlət sektoru bu işdə fəal olacaq. Ancaq Sumqayıtdan fərqli olaraq bizim başqa şəhərlərdə vəziyyət acınacaqlıdır. Şəhər nəqliyyatı bərbad vəziyyətdədir. İstifadə olunan avtobuslar heç bir meyarlara cavab vermir. Ona görə mən həm yerli icra orqanlarına, həm də Nəqliyyat, Rabitə və Yüksək Texnologiyalar Nazirliyinə müvafiq göstəriş vermişəm ki, mənə geniş məlumat versinlər, mövcud avtobus parkı nə vəziyyətdədir? Biz bu məsələni də həll etməliyik”.
Məsələ ilə bağlı AYNA-nın sorğusunu cavablandıran Nəqliyyat, Rabitə və Yüksək Texnologiyalar Nazirliyinin (NRYTN) Dövlət Avtomobil Nəqliyyatı Xidmətinin (DANX) İctimaiyyətlə əlaqələr şöbəsinin rəhbəri Nuridə Allahyarovanın sözlərinə görə, hazırda ölkə üzrə ümumi 40 min ədəd taksi mövcuddur: "Bakı istisna olmaqla, regionlar üzrə 17 min ədəd taksi var ki, onlardan da 3880 ədədi rəsmi, 13270 ədədi isə qeyri-rəsmi fəaliyyət göstərir”.
"Tezliklə respublikada taksi fəaliyyəti üzrə sahibkarlarla bağlı vəziyyət, onların sayı elektron baza şəkilində hazırlanacaq və Daxili İşlər Nazirliyinə təqdim olunacaq. İşçi qrup bu istiqamətdə qiymətləndirmə hazırlayıb və nəticələr var. İşçi qrupun rəyinə görə, regionlar üzrə 5 min taksi xidmətinin fəaliyyət göstərməsi kifayətdir. Ancaq bu sahədə xeyli sayda insan fəaliyyət göstərməyə can atır. Şəxsi avtomobili olan istənilən şəxs bu sahədən istifadə edə bilir, ikinci iş, əlavə gəlir kimi baxır. Nəticədə bu sahədə qismən pərakəndəlik, boşluq hökm sürür”. – Allahyarova bildirib.
O, qeyd edib ki, taksi xidməti mövcud avtomobil nəqliyyatının təhlükəsizliyi və digər qanunvericilik aktları ilə tənzimlənir: "Bu səbəbdən əlavə ciddi tələblər, standartlar qoya bilmirik. Hazırda avtomobili olan şəxslər fərqlənmə nişanı ilə fəaliyyət göstərirlər ki, burada da yalnız verginin ödənilməsinə nəzarət var. Amma bizim tərəfdən təqdim olunan təkliflərdə taksi xidməti üçün yeni standartlar müəyyən olunub. Bu, fərqlənmə nişanı olmayacaq, sahibkarlığa buraxılış, icazə formasında olacaq. Və bu, yenidən lisenziyanın tətbiqi deyil, biz o qaydanın tətbiqinin əleyhinəyik”.