MUMtv.az: - Seçki marafonu sürət götürdükcə proseslərə maraq daha da güclənamizədlərin qeydiyyatı başlayıb. Yaxın günlərdə isə qeydiyyata alınmış namizədlərin təbliğat-təşviqat kampaniyasına start veriləcək.

Bəs siyasi partiyalar öz namizədlərinin təbliğat-təşviqat kampaniyası üçün nə qədər vəsait ayırmağı nəzərdə tutublar?

Bizim.Media bu suala cavab tapmaq üçün seçkidə iştirak qərarı vermiş bəzi partiyaların sədrlərinə müraciət edib.

Böyük Quruluş Partiyasının sədri Fazil Mustafa:

“İlkin olaraq bizim partiya seçki kampaniyası üçün 6 min manat vəsait ayırıb. Təbii ki, təbliğat kampaniyasında bu vəsait artırılacaq. Çünki təşviqat materiallarının hazırlanmasına böyük ehtiyac var. İlkin vəsait ancaq imzatoplama və digər məsələlərin həlli üçün nəzərdə tutulub”.

Ağ Partiyanın başqanı Tural Abbaslı:

“Partiyamız seçkilərə 40 namizədlə qatılır. Amma partiyamızın seçkilərlə bağlı hələlik konkret büdcəsi yoxdur. Partiyanın büdcəsi namizədlərin seçki büdcəsindən formalaşacaq. Seçki prosesində çalışacağıq ki, ianələr cəlb edək. Partiya olaraq çalışırıq ki, minimum xərclərlə maksimum nəticə əldə edək. Ona görə də biz çalışacağıq ki, posterlər, bukletlər və digər təbliğat vasitələrini çap edək.

Bununla belə, partiyanın insan resurslarından istifadə edərək xərcləri minimuma endirmək istəyirik. Yenə də deyirəm ki, gəlirlərimiz olmadığı üçün namizədlərə yardım edə bilmirik”.

REAL Partiyasının sədr müavini Natiq Cəfərli:

“Qanunvericiliyə görə hər bir namizədin vəsait toplamaq ixtiyarı var. Bununla bağlı bizim hesablar artıq açılıb. Əgər bütün 13 namizədimiz rəsmi qeydiyyatdan keçəcəksə, o zaman “friendraising”lə bağlı daha çox məlumat paylaşacağıq ki, arzu edən şəxslər qanun çərçivəsində bizə daha çox maddi yardım göstərsinlər. Bununla yanaşı, partiya hər bir namizədin təşviqat materiallarının çap və digər reklam xərclərini öz üzərinə götürüb”.

Azərbaycan Xalq Partiyasının sədri Pənah Hüseyn:

“Bu məsələ qanunla tənzimlənir. Hər bir namizəd və yaxud onu irəli sürən partiya namizədin qeydə alınmasından sonra fərdi hesab açır. Bizim 60-dan çox namizədimiz olmadığına görə partiyamızın vahid seçki fondu yoxdur. Bununla belə irəli sürdüyümüz namizədlər qeydə alınandan sonra partiya olaraq imkanımız daxilində hər bir namizədə təbliğat-təşviqat kampaniyası aparmaq üçün müəyyən yardımları edəcəyik”.

Azərbaycan Milli İstiqlal Partiyasının sədri Arzuxan Əlizadə:

“Məlumdur ki, uğurlu seçki kampaniyası aparmaq üçün yaxşı maliyyə vəsaiti lazımdır. Bizim də maliyyə resursları ilə bağlı müəyyən planlarımız var. Çalışacağıq ki, partiya olaraq namizədlərimizin zəruri maliyyə xərclərini qarşılayaq.

Amma hazırda imzatoplama kampaniyası olduğundan partiyanın yalnız insan resurslarından istifadə olunur. Bunun üçün əlavə maliyyəyə ehtiyac yoxdur. Bildiyiniz kimi, AMİP Milli Məclisdə təmsil olunmadığı üçün dövlətdən maliyyə yardımı almır. Bununla belə, partiyamızın üzvlük haqlarından və ianələrdən formalaşan bəlli bir büdcəsi var. Biz də təbliğat kampaniyası zamanı həmin büdcədən istifadə etməyi düşünürük”.