Azərbaycan Avtomobil Yolları Dövlət Agentliyi “Cavanşir” yol ötürücüsünün yerləşdiyi ərazidə yeni yol infrastrukuturunun yaradılması istiqamətində son vəziyyəti açıqlayıb.

Qurumdan verilən məlumata görə, artıq körpünün sökülmüş hissələrinin ərazidən daşınması yekunlaşıb.

Qeyd olunub ki, ərazidə yararsız qruntun qazılaraq çıxarılması, kommunikasiya xətlərinin köçürülməsi, ardınca əks-dolğu işləri icra olunaraq yeni yol yatağının inşası istiqamətində işlər aparılıb.



Layihəyə uyğun olaraq yol ötürücüsünün yerləşdiyi ərazidə yeni yol əsasının inşası da yekunlaşdırılaraq artıq asfaltlanma işlərinə başlanılıb.

Bildirilib ki, aparılan işlər həm nəqliyyat vasitələrinin, həm də piyadaların ərazidə rahat hərəkətini təmin edəcək.

Qeyd edək ki, 1962-ci ildə istismara verilən körpünün əhəmiyyətini itirməsi səbəbindən bu ilin may ayında söküntüsünə başlanılıb.