MUMtv.az: - Qarşıdan gələn növbədənkənar parlament seçkiləri diqqəti hazırki millət vəkillərin fəaliyyətinə yönəldib.
Artıq sosial şəbəkələrdə deputatların fəaliyyəti, onların növbədənkənar parlament seçkilərində yenidən mandat sahib ola bilib-bilməyəcəkləri ətrafında müzakirələr açılıb.

Reportyor.info mövzunun aktuallığını nəzərə alıb deputatların fəaliyyəti ilə bağlı kiçik araşdırma aparıb.

Yazıda əsasən biznes sahibi olan, mediada oliqarx deputatlar kimi təqdim edilən millət vəkillərinin fəaliyyətinə nəzər salacağıq. Onların 4 ildə nə ilə yadda qaldıqlarını incələməyə çalışacağıq.

Hazlrki parlamentdə xeyli sayda biznesmen deputatlar təmsil olunur ki, ictimai rəydə onların fəaliyyəti əsasən korporativ maraqların müdafiəsindən ibarət olduğu fikri hakimdir.

Belə deputatlardan biri də 77 saylı Masallı şəhər seçki dairəsindən deputat seçilən Məşhur Məmmədovdur.

Məşhur Məmmədov oliqarx deputatlar kateqoriyasına aid edilir. Buna səbəb “Embawood” şirkətinin ona məxsus olması barədə məlumatların olmasıdır.

“Embawood” Azərbaycanın ən iri mebel şikrətidir. Məşhur Məmmədovun avtobiqorafiyasında onun şirkətin təsisçisi olduğu qeyd edilib. Deputat olduqdan sonra biznes sahəsindən geri çəkilib-çəkilmədiyi barədə sual açıq qalır. Qanun millət vəkillərinin bizneslə məşğul olmasını qadağan edir. Məşhur Məmmədovun qanuna necə “əməl” etdiy onun haqqında mediada dərc edilən yazılarda aydın şəkildə görünür. Lakin bizim mövzumuz bu deyil. Mövzumuz Məşhur Məmmədovun deputat kimi fəaliyyətinə nəzər salmaqdır.

Təəssüf ki, Məşhur Məmmədov bu 4 il ərzində hər hansı təklifi, fikri ilə yadda qalmayıb. Hər halda bu barədə məlumat yoxdur. Əksinə, internet resurslarından axtarış verərkən onun şirkəti ilə bağlı məhkəmə çəkişmələrindən bəhs edən xəbərlərə rast gəlinir.

Məşhur Məmmədovun qeyri-fəallığı onu növbədənkənar parlament seçkilərindən kənarda qoya bilər. Hakimiyyətin seçkiyə münasibətdə davranışlarından sezilir ki, növbədənkənar seçkilər nəticədə cəmiyyətin qəbul edəcəyi bir parlamentin formalaşmasını şərtləndirsin. Belə bir parlamentdə çətin ki, Məşhur Məmmədovun yeri görünsün.

Qeyri-fəallığı ilə seçilən deputatlardan biri də Cavanşir Feyziyevdir.

Cavanşir Feyziyev “Avromed” şikrətinin təsisçisi kimi tanınır. Lakin 2020-ci ildə şirkətin yaydığı açıqlamaya görə, Cavanşir Feyziyev 2010-cu ilə qədər “Avromed Company” QSC-nin direktoru vəzifəsində çalışıb.

İngiltərədə Cavanşir Feyziyevin ailəsinə məxsus 5.6 milyon funt-sterlinqin müsadirə olunması ilə bağlı materiallarda isə onun 2013-cü ildə viza müraciəti zamanı özünü “Avromed Company” QSC-nin icraçı direktoru kimi təqdim etdiyi bildirilir.

Bundan başqa, Cavanşir Feyziyevin tütün biznesi ilə məşğul olduğu deyilir. “Tabaterra Leaf” şirkətinin ona məxsus olduğu barədə mediada dəfələrlə yazılıb. Qarşı tərəf bu iddiaları təkzib etməyib.

Cavanşir Feyziyev əsasən Böyük Britaniyadakı məhkəmə çəkişməsi ilə yadda qalıb. Bu ilin martında məlumat yayılmışdı ki, Böyük Britaniya məhkəməsi Londonda Azərbaycan Milli Məclisinin üzvü Cavanşir Feyziyev və həyat yoldaşına məxsus $50 milyon dollar dəyərindəki mülkə həbs qoyulması ilə bağlı qərarı qüvvədə saxlayıb.

Bütün bunlar Cavanşir Feyziyevin deputat kimi karyerasını sual altına alır.

Növbəti yazıda digər oliqarx deputatların fəaliyyətinə nəzər salacağıq.

Redaksiya olaraq məqalədə qaldırılan iddialarla bağlı qarşı tərəfin mövqeyini işıqlandlrmağa hazırıq!