Gündəm
“Məxfi şəkildə məlumat verirlər” - Baş katib futbolçu “agent”lərindən danışdı
Mumtv "Yeni Sabah” -a istinadən xəbər verir ki, o, öncə bu gün qəbul edilən nizamnamə haqqında danışıb:
"İlk növbədə Nizamnaməni təkmilləşdirmək istədik. Bir sıra Komitə ləğv olundu. Əvvəlki Nizamnamədə bir sıra Komitənin fəaliyyəti nəzərdə tutulmuşdu. Onlar ləğv edildi. Ehtiyac olsa, İK yenilərini yaradacaq. İK üzvlərinin sayı artdı. Bu təcrübə beynəlxalq futbol qurumlarında da tətbiq edildi. Belədə vitse-prezidentlərin sayını da artırmağa zərurət duyuldu. Birinci vitse-prezident postu ləğv edildi. İcraçı vitse-prezident və 3 vitse-prezident vəzifəsi tətbiq olunacaq. Baş katib də öz vəzifəsini icra edəcək”.
Baş katib millimizin yeni baş məşqçisinin kimliyinin mart ayının sonuna kimi müəyyənləşəcəyini söyləyib:
"Malta ilə oyuna qədər baş məşqçi məsələsinə aydınlıq gələcəyinə ümid edirəm".
E.Məmmədov danışılmış oyunlarla bağlı məsələyə də toxunub. O, bildirib ki, oyun alqı-satqısında iştirak edənlər içində digər idman növləri ilə məşğul olan şəxslər də var:
"Bəzi klublarda işləyən nümayəndələrimizə "çox sağ ol” demək istərdim. Futbolçular bizə məxfi şəkildə məlumat verirlər. İki il əvvəl hesabat konfransında bu məsələləri başlatdıq. Biz onlara məxfi nömrə vermişdik. Onlar da artıq bizlə əlaqə qururlar. AFFA-nın prezidenti də bildirib ki, bu məsələləri aradan qaldıracağıq. Hazırda dünya futbolunun ən böyük təhdidi danışılmış oyunlardır. Biz də aktiv fəaliyyətlə məşğul oluruq. İstintaq gedir, tam açıb deyə bilmərəm. Adlar, tanınmış insanlar olacaq. Qorxulu odur ki, digər idman növlərinin nümayəndələri də bu məsələlərdə saxlanılıb. Futbolla bağlı olmayan adamlardır. Məhdudiyyət yoxdur. Biz bu "virus”u məhv etməliyik”.
O, milli komandanın yoxlama oyun planından bəhs edib:
"Martda Maltayla səfərdə yoxlama oyunu keçirməklə yanaşı, daha bir matç planlaşdırırıq. Bu, Latviya yığmasıdır. Həmin oyunu da Maltada keçirməyi düşünürük. Bundan əlavə, mayda Türkiyə ilə qarşılaşacağıq. Bir də Uels Futbol Federasiyası bizə müraciət edib. Onlar Avropa çempionatına hazırlıq çərçivəsində son oyunlarını bizimlə keçirmək istəyirlər. Çünki qrup oyunlarının ikisini Bakıda keçirəcəklər. Elə bu səbəbdən də bizimlə burda oynamaq istəyirlər".