Oksford Universitetinin alimləri şəkərli içkilərin tez-tez istehlakının ürək-damar xəstəlikləri (CVD) və insult riskini artırdığını müəyyən ediblər.

"MUMTv.az" xəbər verir ki, tədqiqatın nəticələri "BMC Medicine" jurnalında dərc olunub.

Tədqiqat zamanı alimlər 100 mindən çox insanın yemək vərdişlərini qiymətləndiriblər. Tədqiqatçılar sağlamlıq məlumatları toplayıb və iştirakçıların 206 növ qida və 32 içkidən karbohidrat qəbulunu təhlil ediblər. Tədqiq olunan karbohidratların növləri şəkərə bölünüb, daha sonra sərbəst şəkərlərə, sərbəst olmayan şəkərlərə və liflərə (nişastalı olmayan polisaxaridlər) ayrılıb. Bundan sonra 9 ildən çox davam edən müşahidə dövrü başlayıb.

Bu müddət ərzində 10 minə yaxın könüllüdə ürək xəstəliyi və insult aşkar edilib. Əlavə araşdırmalardan və bir sıra düzəlişlərdən sonra alimlər ümumi karbohidrat qəbulunun ürək-damar xəstəlikləri riskinə heç bir təsiri olmadığı qənaətinə gəliblər. Bununla belə, qazlı içkilər, meyvə şirələri və süd kokteylləri kimi qidalardan sərbəst şəkərin qəbulunun artması bütün CVD riskinin artması ilə əlaqələndirilir.

Konkret olaraq, sərbəst şəkərlərdən alınan enerjinin (kalori) hər beş faizi üçün insult riski 10 faiz, ürək xəstəliyi riski isə 6 faiz artıb.