Gündəm
Gündəm / Dünya
Finlandiya Rusiya ilə sərhəddə divar tikməyə başlayıb
"MUMtv.az" "haberglobal"a istinadən xəbər verir ki, Finlandiya sərhəd təhlükəsizliyini artırmaq üçün Rusiya ilə sərhədində 200 km uzunluğunda divar inşa etməyə başlayıb.
Sərhədçilər divarın 3 metr hündürlüyündə olacağını və üzərində tikanlı məftillərin olacağını açıqlayıb.
Finlandiya 1340 km uzunluğunda Avropa İttifaqının Rusiya ilə ən uzun sərhədini bölüşür. Hazırda sərhəddə yüngül taxta hasarlar var. Ukraynada döyüşmək üçün ordudan qaçan rusların sayının artması ilə əlaqədar Finlandiya divar tikmək qərarına gəlib. Finlandiya Parlamenti çərşənbə axşamı ölkənin NATO alyansına üzvlük iddiasını sürətləndirəcək qanun layihəsinin müzakirəsinə başlayıb və çərşənbə günü səsvermənin keçirilməsi gözlənilir.
İmatra sərhəd qapısında divar işlərinə meşələrin təmizlənməsi ilə başlanıldığı halda, yeni yolun və divarın tikintisinə mart ayında başlanması planlaşdırılır.
Divarın müəyyən yerlərində gecə görmə kameraları, işıqlar və dinamiklər yerləşdiriləcək.
Sərhəd Mühafizəsinin məlumatına görə, İmatrada 3 km-lik pilot layihənin iyunun sonunadək başa çatdırılması gözlənilir.
Finlandiya iyul ayında Sərhəd Mühafizəsi Aktına yeni dəyişikliklər edərək, daha möhkəm bir divar inşa etməyə imkan verdi. Mal-qaranın sərhəddən keçməsinin qarşısını almaq üçün mövcud taxta hasarlardan istifadə edilir.
Rusiya Ukraynanı işğal edəndən bəri Finlandiya şərq sərhədini möhkəmləndirməyə çalışır.
Sentyabrda prezident Vladimir Putinin Ukraynada döyüşmək üçün ehtiyatda olan hərbçilərin səfərbər edilməsi əmrindən sonra çoxlu sayda rusiyalı Finlandiyaya qaçmağa başladı.
Ötən il fevralın 24-də Rusiyanın işğalından sonra Finlandiya və İsveç illərlə bitərəfliyə son qoyaraq NATO-ya üzv olmaq qərarına gəliblər.
ABŞ və Kanada ilə yanaşı, 28 Avropa ölkəsindən ibarət NATO Türkiyə və Macarıstan istisna olmaqla, iki Skandinaviya ölkəsinin iştirakını təsdiqləyib.
Finlandiya hökuməti üzvlük ərizəsini aprelin əvvəlində keçiriləcək seçkilərə qədər yekunlaşdırmaq istəyir.
Yanvarda Stokholmda Quran yandırıldıqdan və prezident Ərdoğanı hədəf alan etiraz aksiyalarından sonra Türkiyə bu iki ölkə ilə danışıqların qeyri-müəyyən müddətə dayandırıldığını açıqlamışdı. Bazar ertəsi açıqlama verən xarici işlər naziri Mövlud Çavuşoğlu, iki ölkə ilə yeni görüşün martın 9-da Brüsseldə olacağını söylədi; İsveç və Finlandiyanın NATO üzvlüyü üçün Türkiyə qarşısında müəyyən öhdəlikləri olduğunu qeyd edərək, "Bu addımları görmədən İsveçin NATO üzvlüyünə "hə" deməyimiz mümkün deyil" dedi.
MUMtv.az
Jalə Əsədova