MUMtv.az: - Qaradağ rayonunda məcburi köçkünlər üçün salınmış “Qobu-PARK 1” yaşayış kompleksində bir neçə bina qəzalı vəziyyətə düşüb.

Bu barədə Qlobal.az məlumat əldə edib.

Məlumata görə qəzalı vəziyyətə düşən binalar 4 və 8 saylı binalardır.

Səkkiz saylı binada problemin 1 il əvvəl təməl sistemində yarandığı bildirilir. Tikinti zamanı ərazidə geoloji kəşfiyyatın düzgün aparılmaması və katlavan işlərinin keyfiyyətsiz görülməsi binanın hazırda əyilməsinə gətirib çıxarıb.

Problemin qarşısının nisbətən alınması üçün ötən il 8 saylı binanın təməl hissəsinə 35 kub metrədək beton tökülüb. Ancaq buna baxmayaraq, hazırda binada çox ciddi problemlər qalmaqdadır.

Podratçı şirkətin mühəndislərinin və yerli hökumət nümayəndələrinin dəfələrlə əraziyə gələrək baxış keçirdikləri, ancaq ciddi tədbir görmədikləri vurğulanır.

Məlumatda qeyd edilir ki, güclü külək əsəndə 4 saylı binada da hiss ediləcək qədər yırğalanma baş verir.

Bütün bunlardan ciddi narahatlıq keçirən sakinlər hər an ağır faciələr baş verə biləcəklərini deyirlər.

Qeyd edək ki, “Qobu-Park 1” Yaşayış kompleksinin podrat işlərini “Kristal Abşeron” MTK həyata keçirib.

Mediada yazılanlara görə “Kristal Abşeron” MTK Milli Məclisin deputatı Ağalar Vəliyevə məxsusdur.

Məsələ ilə bağlı qarşı tərəfdən mövqe öyrənə bilmədik.