“Arif Hacılının müavini Gülağa Aslanlı da zəhmət çəkib mənə bir status həsr edib. Yazıda belə bir abzas yer alır: “Məşhur Lənkəran hadisələri zamanı adi təşkilatı vəzifələrin öhdəsindən gələ bilməyərək, Partiyanın başqanı İsa bəyi və mühafizəçiləri gözləyən pusqudan xəbərdar etməyən, müsavatçılara edilən hücum zamanı (qonşu rayonun partiya fəallarından fərqli olaraq)orada olmayan, əqidaşlarının müdafiəsində iştirak etməyən şəxsin bağışlanaraq, onunla yol gedilməsinin səhf olması ortadadır”. Gülağa Aslanlı demək istəyirsə ki, hücumdan xəbərim olub və xəbərdar etməmişəm, yalnız onu deyə bilərəm ki, məni bunda ittiham etmək üçün çox ləyaqətsiz adam olmaq lazımdır”.

"MUMtv.az"ın Demokrat.az-a istinadən  xəbərinə görə, bunu Müsavat Partiyasının başqanlığına namizəd Yadigar Sadıqlı bildirib.

Y.Sadıqlı bildirib ki, Lənkəranda İsa Qəmbərə olan hücum qeyri-seçki dövründə baş verən bir ilk idi: 

“Əvvəllər belə şeylər yalnız seçki dövründə olurdu. Ona görə mənim üçün də gözlənilməz oldu. Qonşu rayonun partiya fəallarına gəlincə, məhz Masallı təşkilatının sədri Xasay Fərzulladan xahiş etmişdim ki, başım təşkilatı işlərə qarışdığından gələn qonaqları Lənkəranın girəcəyində qarşılasın və tədbirin keçiriləcəyi yerə qədər müşayiət etsin. Tədbirin başlamasına 30-40 dəqiqə qalarkən icarəyə götürdüyümüz yerin sahibi zəng edərək icra hakimiyyətindən təzyiq olduğunu və razılaşmamızın ləğv edildiyini bildirir. Təcili şəkildə tədbiri təşkilatın sədri İmanverdi Əliyevin evinə keçirməyi qərara alırıq. Artıq Lənkərana daxil olan Xasay bəyə zəng edərək vəziyyəti anladıram, qonaqlarla bir yerdə çay içib "vaxt öldürməyi" xahiş edirəm. Özüm isə seytnot vəziyyətdə üzvlərimizə, dəvət etdiyimiz qonaqlara zəng edərək yeni məkan barədə məlumat verməyə çalışıram. Bu zaman İsa Qəmbərə hücum edildiyini və gələnlərin geri qayıtdığını eşidirəm. Üzvlərimizdən birinin maşınına minib İsa Qəmbərgilə çatmağa çalışıram, lakin edəcək bir şey yoxdur. Gördüyüm yalnız Lənkəranın çıxacağında Elman Fəttahın maşınının önünün kəsilməsi cəhdi və şüşələrinin sındırılması olur. İsa Qəmbər isə ikinci maşını gözləmədən şütüyüb getmişdi. Bir də ki, bu hücum məsələsini nə şişirtmisiniz? O zamanlar hər gün sıravi və çox da sıravi olmayan müsavatçılara hücumlar, basqılar, təzyiqlər olurdu, İsa Qəmbərə də olub olub da, nə olsun? Müqəddəs varlıqdır, başqa müsavatçılardan çox fərqlidir? O müsavatçıları ana doğmayıb, canları can deyil? Hücum da İsa Qəmbərin xeyrinə işləyib, reytinqini xeyli qaldırıb və ötən 10 ilə yaxın müddət ərzində bir də heç vaxt bu qədər gündəmdə olmayıb.  Ümumiyyətlə, hadisə olub keçəndən sonra məsləhət vermək asandır. Sizə də, Gülağa Aslanlı, 2013-cü ildə seçkilərdən sonrakı aktların əslini MSK-ya verməmənizlə bağlı irad bildirmək olar. Sonuncu gün də bu işlə məşğul olmaq əvəzinə zibil atdınız, kommunal xərcləri ödəyən zaman polis tərəfindən saxlanıldınız. Ümumiyyətlə, sizə qarşı bir təxribat ola biləcəyini düşünməməniz, bu zaman aktları başqa birisinin MSK-ya aparması ilə bağlı tədbir görməməniz heyrətamizdir. O təxribat daha gözlənilən idi, nəinki İsa Qəmbərə hücum. Amma başqasına çatanda daha bəsirətli olursunuz)). Ya da ki, son seçkilərdə namizədlərin partiya qərarı və şəxsi təşəbbüslə irəli sürülməsi arasındakı fərqi sizin kimi illərlə seçki mütəxəssisi və hətta MSK üzvü olmuş birinin bilməməsi lap təəccüblüdür. Bir də əsas məsələ bilirsiniz nədir? Tutalım, mənə qarşı dediklərinizdə haqlısınız. Bəs partiya rəhbərliyinə qarşı belə pusqu hazırlanmasında rol oynamış birisini başqan müavini təyin edəndə, elə həmin partiya rəhbərliyi tərifləyəndə niyə etiraz etmirdiniz? Əksinə, siz də tərifləyirdiniz. Cavab sadədir: sizin kimilərin heç vaxt müstəqil mövqeyi olmur, siz rəhbərliyin təriflədiyi adamı tərifləməyə, vurduğu adamı vurmağa öyrəşmisiniz. Həyat kredonuz budur”.