Bu barədə qanun layihəsi Dövlət Dumasının elektron məlumat bazasında dərc edilib. Qanun layihəsinə edilən izahatda qeyd edilib ki, bu dəyişikliklər tarixi boşluq və qanunvericiliyin birmənalı şərh edilməməsi cəhdlərini aradan qaldıracaq, vətəndaşların vətənpərvərlik tərbiyəsinə töhfə verəcək. Qeyd edək ki, Ukrayna müharibəsinin başlamasından sonra Rusiyanın SSRİ xəyalları yenidən alovlanıb. Hücum əməliyyatlarında istifadə olunan tanklarda və hərbi texniklarda SSRİ bayrağının dalğalanması ilə Kremlin imperiya arzusu özünü biruzə verib.
Hətta Prezident Vladimir Putin hücum əmrini verdiyi açıqlamasında Ukrayna dövlətinin keçmiş Rusiya ərazisi olduğunu da deyib.
Ümumiyyətlə, Putinin uzun illərdir SSRİ-ni yenidən bərpa etmək arzusu olduğu da açıqdır. İndi isə Rusiya bayrağının SSRİ bayrağı ilə əvəz olunması təklifi gündəmdədir. Əlbəttə ki, müharibənin getdiyi bir vaxtda belə bir ideyanın ortaya atılması da birmənalı qarşılanmır.
Bəs həqiqətən Rusiya bayrağı SSRİ bayrağı ilə əvəz oluna bilərmi? Mövzu ilə bağlı Cebhe.info-ya danışan politoloq Natiq Miri deyib ki, Rusiya bunu edə bilməz:

“Çünki bu, rəsmi Moskvanın boyunu aşan məsələdir. Rusiyanın bunu etmək üçün hərbi qüdrətə ehtiyac var. Hansı ki, hazırda həmin qüdrətdən danışmaq belə mümkün deyil. Nəzərə almaq lazımdır ki, Rusiyanın hərb maşını artıq neçənci dəfədir ki, darmadağın olur. Bununla yanaşı, Rusiyanın iqtisadi qüdrətə də ehtiyacı var, amma sanksiyalar fonunda rus iqtisadiyyatı çökəcək. Fikrimcə, bu təklif elə ideya və xəyal olaraq da qalacaq. Bu məsələ sadəcə olaraq Rusiya dövlətinin niyyəti olaraq ortaya çıxıb. Çünki Kommunist Partiyası müstəqil siyasət yeridən bir partiya deyil. Həmin partiyanın varlığı və Dövlər Dumasında iştirakı belə Kremldə həll olunan məsələlərdir. Hesab edirəm ki, bu fikri də sadəcə olaraq Kommunist Partiyasının adından təqdim edirlər. Bu, sadəcə olaraq Qərb dünyasına olunan bir təzyqidir. Lakin dünya ictiamiyyəti artıq belə məsələləri ciddi qəbul etmir”.
Politoloqun sözlərinə görə, Rusiya dövləti bayrağının SSRİ bayrağı ilə əvəz olunması təklifi yeni rus imperiyasının yaranması yönündə siqnaldır:
“Əlbəttə ki, dünya buna imkan verməyəcək. Qərbin Ukraynaya verdiyi dəstək də bunun nümayişidir. Hazırda dünyada iki ideologiya arasında ciddi bir mübarizə gedir. Üstəlik bu mübarizədə məkan olaraq Ukrayna seçilib. Bir tərəfdə demokratiya, digər bir tərəfdə isə avtoritar sistemlərin nüvəsi olan Rusiyanın imperiya xisləti dayanır. Ona görə də, Ukraynada baş verən prosesdə kimin qalib gəlməsi çox önəmlidir. Düşünürəm ki, yeni bir imperiyanın, xüsusən də Sovet imperiyasının bərpasına Qərb dünyası imkan verməyəcək. Həmçinin, postsovet məkanındakı ölkələr də mərkəzdən qaçma siyasətinə üstünlük verirlər. Ukrayna müharibəsi açıq şəkildə göstərdi ki, Rusiya heç bir zaman heç bir dövlətə təhlükəsizlik çətiri ola bilməz. Üstəlik, Kreml özünün arxa bağçası saydığı dövlətlərlə bərabər hüquqlü münasibətlər sistemi qurmayıb və qurmaq da istəmir”.