Gündəm
Gündəm / Siyasət
Brüssel görüşü öncəsi İrəvan prosesi pozur: Ermənilər nəyə güvənir? - İNCƏLƏMƏ...
MUMtv.az: - Üçtərəfli İşçi Qrupun dekabrın 1-də Moskvada keçirilən iclasında razılaşmaları formalaşdırmaq mümkün olmayıb.
Bunu dekabrın 2-də “Azadlıq” radiosuna Ermənistan Təhlükəsizlik Şurasının rəhbəri Armen Qriqoryan Rusiya, Azərbaycan və Ermənistan Baş nazirlərinin müavinlərinin görüşünü şərh edərkən deyib. Ermənistan Təhlükəsizlik Şurasının rəhbəri faktiki olaraq Bakını Moskva görüşünü pozmaqda ittiham edib. “Biz yolları açmağa, Sovet İttifaqı dövründə mövcud olan infrastrukturun bərpasını müzakirə etməyə hazırıq.
Biz Azərbaycanın ərazisindən başqa ölkələrlə əlaqə üçün istifadə edə bilək, eləcə də Azərbaycan Naxçıvanla əlaqə yaratmaq imkanı əldə etsin”, – Qriqoryan bildirib. “Belə olan halda niyə tərəflər razılığa gəlmədi?” sualına Qriqoryan bildirib ki, Azərbaycan müqaviləyə “dəhliz” məsələsini daxil etməyə çalışır ki, bu da Ermənistan üçün qəbuledilməzdir. “Hesab edirəm ki, Azərbaycan Soçidə əldə olunmuş razılaşmaların təşviqinə imkan verəcək elə bir siyasi iradə nümayiş etdirə bilməz”.
Xatırladaq ki, regional kommunikasiyaların açılmasına dair razılaşma üç ölkə liderinin noyabrın 26-da Soçidə keçirilən görüşünün yekunları üzrə elan edilib. Bu razılaşma Moskvada sənəd şəklində rəsmiləşdirilməli idi, lakin bu baş verməyib.
Maraqlıdır ki, Ermənistanın yenidən dəhliz məsələsindən boyun qaçırması nəyə hesablanıb? Brüssel görüşü öncəsi erməni tərəfi kimə güvənir?
Məsələ ilə bağlı Cebhe.info-ya açıqlamasında politoloq Məhəmməd Əsədullazadə deyib ki, Ermənistanın güvənc yeri Qərbdir:
"Ümumiyyətlə, Soçi Bəyannaməsinin imzalanması və İşçi Qrupunun bundan sonra bu istiqamətdə müəyyən məsələləri həll edəcəyi deyilirdi. Həftə ərzində də bununla bağlı açıqlama veriləcəkdi. Amma İşçi Qrupunun iclasında Ermənistan prosesi pozub. Ermənistan tərəfi konkret olaraq, dəhlizdən imtina edir və bu məsələdə Qərbə güvənir. Çünki bəzi güclər Zəngəzur dəhlizinin açılmasına qarşıdır. Ermənistan da buna uyğun davranış sərgiləyir. Baxmayaraq ki, hətta Rusiya Prezidenti Vladimir Putin də görüşdə dəhliz ifadəsini işlədib, bununla belə, Ermənistan dəhliz şərti ilə razılaşmaq istəmir. Ermənistan tərəfi köhnə Sovet yollarının işlənməsini önə çəkir”.
Ekspertin fikrincə, Ermənistanın bu imtinası Rusiyanın da maraqlarına cavab verir:
“Rusiya konkret olaraq məsələni uzatmağa çalışır. Amma Azərbaycan müəyyən təzyiqlər etməlidir. Bütün bunlara baxmayaraq, dəhliz məsələsi həllini tapacaq. 10 noyabr birgə Bəyannaməsinin 9-cu bəndində də dəhliz məsələsi var. Ermənistan prosesi uzatmağa çalışsa da, müəyyən danışıqlardan sonra Azərbaycanla dəhliz məsələsi üzrə razılaşacaq".