Son illər taksi xidmətinə tələbatın artması müşahidə olunur.
Fərdi taksinin apardığı yolu xidmət taksisinin nisbətən ucuz qiymətə aparması bu tələbatı getdikcə artırır. Bu tələb fonunda bəzən sürücü-sərnişin münasibətlərində narazılıq yaradan hallar da olur. Bəzən sərnişin taksi sifariş edərkən gedəcəyi ünvana yaxın, tanınan məkan adı deyir və həmin nöqtəyə çatanda sürücünün bir qədər irəli sürməsini istəyir. Bəzi sürücülər isə sərnişinin bu istəyinə qarşılıq vermir və xidmətə sadəcə sifarişdə qeyd olunan məkanın daxil olduğunu vurğulayır.
Bəs, qanunvericilik bu barədə nə deyir? Sərnişinin taksini sifariş etdiyi nöqtədən bir qədər uzaq məsafəyə ödənişsiz olaraq sürdürməyə haqqı varmı?
MUMTV.az bildirir ki, nəqliyyat məsələləri üzrə ekspert İlqar Hüseynli Redaktor.az-a açıqlamasında bildirib ki, sürücü-sərnişin münasibətlərindəki narazılığı aradan qaldırmaq üçün taksometrlərdən istifafə edilməsi vacibdir:
"Qanunvericiliyə əsasən, nəzərdə tutulan məsələ ilə bağlı taksi xidməti həyata keçirən sürücülər üçün mövcud məhudiyyət yoxdur. Yəni, sürücünün məsafədən artıq ödənişsiz xidmət göstərməsi ilə bağlı hansısa müddəa qeyd olunmayıb. Qanunvericilikdə sürücülərin göstərdiyi xidmətə uyğun maddələr yer alıb. Dünyanın bir çox ölkələrində taksilər taksometrlə təmin olunub. Taksometr sayəsində daşınma göstəricilərinin uçotu aparılır, gedilən yerə uyğun gediş haqqı müəyyən edilir və gediş haqqının məbləği haqqında sərnişinə məlumatlar verilir. Nəticədə sürücü ilə sərnişin arasında hansısa neqativ hal yaşanmır. Ölkəmizdə bu addımın geniş yayılmasına ehtiyac var”.
Ekspert vurğulayıb ki, sərnişin taksi xidmətindən sifariş olunan məkandan əlavə məsafə üçün istifadə edirsə, az məbləğli əlavə gediş haqqı ödəməlidir:
"Qanunvericiliyə görə, taksi şirkətinin müəyyən etdiyi məbləğ sifariş olunan ərazinin məsafəsindən asılıdır. Əlavə məsafə üçün sərnişin 1-2 manat ödəniş etməlidir. Bəzi taksi şirkətləri isə əlavə məsafə ilə bağlı qərarı özləri təyin edir. Bunu şirkətin daxili nizamnaməsi müəyyən edir və əlavə məsafə 100-200 metr nəzərdə tutulur. Ümumilikdə isə müştərini gözləməyin dəqiqəsi 5 qəpikdir. Əgər müştəri sifariş edib gəlməyibsə, sürücünün gözlədiyi müddətdən və sifarişin yerindən asılı olaraq, müştərinin balansına hesablanır”.