Ankara öz sözünü tutdu və Rusiyanın “S-400” zenit-raket komplekslərini aldı.

“MUMTV.az” "A Haber"ə istinadən xəbər verir ki, bunu Türkiyə prezidenti Rəcəb Tayyib Ərdoğan Atatürk hava limanında təşkil edilmiş mitinqdə çıxışı zamanı deyib.

“Bu barədə nə deyirdilər? Biz almayacağıq, bacarmayacağıq. Biz aldıq? Bəli! Biz - türklər verdiyimiz sözün üstündə dururuq”, - deyə Türkiyə lideri bildirib.

Ərdoğan daha sonra 2016-cı il iyulun 15-dən 16-na keçən gecə Türkiyə xalqının öz cəsarəti və qəhrəmanlığı sayəsində ölkənin müstəqilliyi və gələcəyini qorumasından söz açıb.

"Mən iyulun 16-na keçən gecə ölkəmizin müstəqilliyi və gələcəyini qorumaq üçün tanklar, təyyarələr və güllələr qarşısına çıxan qəhrəman xalqımızı salamlayıram. Heç bir terrorçu təşkilat heç vaxt bizim birliyimizi, həmrəyliyimizi və qardaşlığımızı poza bilməyəcək", - ölkə başçısı qeyd edib.