Azərbaycan Silahlı Qüvvələrinin torpaqlarımızı işğaldan azad etmək üçün sentyabrın 27-dən başlayaraq həyata keçirdiyi əks hücum əməliyyatları bu günədək uğurla davam edir. Artıq bir neçə kənd və əhəmiyyətli yüksəkliklər düşmən işğalından azad edilib. Bununla yanaşı, arxa cəbhədə də xalqımız böyük ruh yüksəkliyi, birlik, əzm nümayiş etdirir. Şirkətlər, sıravi vətəndaşlar, dövlət qurumları Silahlı Qüvvələrə Yardım Fonduna müəyyən məbləğlərdə ianələr ediblər. Bu gün isə Azərbaycan Prezidenti İlham Əliyev, birinci vitse-prezident Mehriban xanım Əliyeva bir aylıq əməkhaqqı məbləğində vəsaiti Silahlı Qüvvələrinə Yardım Fonduna ianə edib. Son 1 ay ərzində SQYF-yə 7 milyona yaxın ianə köçürülüb, ümumi olaraq Fonda 120 milyon manatdan çox pul yığılıb. Bundan başqa, müəyyən şəxslər tərəfindən vətəndaşların topladığı qida və digər ləvazimatlar cəbhə xəttinə çatdırılır.

Bəs Azərbaycan Ordusuna bu yardımların əsl məqsədi nədir?

Millət vəkili, Milli Məclisin Müdafiə, təhlükəsizlik və korrupsiya ilə mübarizə komitəsinin üzvü Erkin Qədirli "Qafqazinfo”ya açıqlamasında bildirib ki, Ordunun bu cür yardımlara əlbəttə ehtiyacı yoxdur və bu sahədə hər hansı boşluq yaranmayıb:

"Aydın məsələdir ki, Azərbaycan Ordusunun təchizatı dövlətin maliyyə imkanları çərçivəsində aparılır. İllər ərzində neftdən gələn gəlirlərin önəmli hissəsi Ordunun gücləndirilməsinə xərclənilib. Hətta bizim Ordunun büdcəsinin düşmənimiz olan Ermənistanın dövlət büdcəsindən çox olduğu illər də olub.

O ki qaldı Orduya yardım fonduna vətəndaşların pul köçürməsinə, bu, ilk növbədə daha çox həm Orduya mənəvi dəstəkdir, həm də vətəndaş iştirakçılığının gücləndirilməsi, vətəndaş təşəbbüslərinin təşkilidir. Prinsipcə, milyardları olan xarici şirkətlər də xeyriyyə kampaniyası açıb vətəndaşlardan 5-10 dollar ianə toplayır. Halbuki, milyardları olan şirkət təkbaşına elə o işləri görə bilər. Bunun çox qədim ənənəsi var. Burada əsl məsələ, vətəndaşlar arasında mənəvi bağları gücləndirmək, konkret bu halda Orduya mənəvi dəstək verməkdir. Bununla göstərilir ki, heç kəs özünü qıraqda saymır, nəyəsə töhfə verməyə çalışır, bir işin qulpundan yapışır və bunun fayda verdiyinə inanır. Bütün bunlar cəmiyyətdə milli birliyə xidmət edir. Bunun başqa adı yoxdur. Maddi anlamda bunu qabartmağın heç bir mənası yoxdur.

Hazırda cəbhə bölgəsinə puldan başqa, ərzaq, geyim, dərman göndərilməsi də bu qəbildəndir. Ya pul verilir, ya da maddi dəyəri olan nələrsə göndərilir. Bunlar hamısı eynidir, Orduya yardım hərfi mənada anlaşılmasın. Aydın məsələdir ki, Azərbaycan Ordusu tam təmin edilir və bunlara ehtiyac yoxdur. Məsələn, corab, təkər nədir ki, guya bunlar tapılmır ki? Torpaqların işğaldan azad edilməsi bütün millətin işi olduğu üçün vətəndaşlar da burada hansısa formada iştirak etmək istəyir”.