Qadınlar arasında həndbol üzrə Azərbaycan çempionatı bərpa olunmayacaq.

Mumtv.azın Oxu.Az-a istinadən verdiyi xəbərə görə, buna səbəb martın 16-da dayandırılmış çempionatda liderlər arasında yaranmış böyük xal fərqidir.

Bunu beynəlxalq dərəcəli həndbol hakimi Ernest Ağakişi saytımıza açıqlamasında bildirib:

"Yaxınlarda federasiya çempionatlar barədə qərar çıxaracaq. Qadınların çempionatında hər şey bəllidir. Onlar oynasa da, oynamasa da, turnir cədvəlində dəyişiklik olmayacaq. Ona görə də, böyük ehtimalla, "Azəryol” çempion elan ediləcək. 

Amma kişilərdə "Bakı” və "Məhsul” komandaları arasında fərq azdır. Bu səbəbdən də, istəyirik ki, çempionluğu müəyyənləşdirmək üçün bu iki komanda arasında oyun keçirək”.

Qeyd edək ki, Beynəlxalq Həndbol Federasiyası və Avropa Həndbol Federasiyası cari mövsümün bütün yarışlarını ləğv edib. Yalnız kişilər və qadınlar arasında Çempionlar Liqasında "Dördlər finalı” (Final Four) qalıb ki, həmin oyunlar dekabrda keçiriləcək.

Onu da bildirək ki, daha əvvəl Azərbaycanda basketbol və voleybol çempionatları bərpa olunmayıb. Basketbolda çempion müəyyənləşdirilibsə, voleybolda mükafatçılar açıqlanmayıb.