Gündəm
“İçimizdə hardasa uduzmuş bir hiss var idi, amma indi qürur duyuram...”
"Biz musiqimizi təmsil etdiyimiz üçün xarici ölkələrdə keçirilən konsertlərdə düşmənlərimizlə dəfələrlə qarşılaşmışıq. Onda içimizdə hardasa uduzmuş bir hiss var idi, amma indi şəxsən qürur hissi keçiririk”
Bunu Moderator.az-a açıqlamasında Əməkdar artist, Azərbaycan Milli Konservatoriyasının müəllimi, nağara ustası Kamran Kərimov deyib. K.Kərimov torpaqlarımızından işğaldan azad edilməsinə görə ölkə başçısına təşəkkür edib:
"Hər bir azərbaycanlı kimi torpaqlarımızın işğaldan azad edilməsinə görə qürur hissi duyuram. Artıq otuz ilə yaxın idi ki, torpaqlarımız işğal altında idi. Biz musiqimizi təmsil etdiyimiz üçün xarici ölkələrdə keçirilən konsertlərdə düşmənlərimizlə dəfələrlə qarşılaşmışıq. Onda içimizdə hardasa uduzmuş bir hiss var idi, amma indi şəxsən qürur hissi keçiririk. İndi o qədər istəyirəm ki, pandemiya qurtarsın və fesivallarda düşmənlərimizlə görüşəndə keçirdiyimiz hissləri yaşayaq. Bu çox böyük uğurdu. Göydə Allah, yerdə Ali Baş Komandanımız və müzəffər ordumuz torpaqlarımızı işğaldan azad etdi. Bir daha Ali Baş Komandanımıza təşəkkürümü bildirirəm. Şəhidlərimizin ruhu qarşısında baş əyirəm, biz bütün bunları onlara borcluyuq. Qazilərimizə Allah şəfa versin. Çox ağır döyüşlər keçiriblər. 44 günə qələbə çaldıq. Şuşanı işğaldan azad edən igidlərimiz sıldırım qayalardan keçiblər. Bir daha azərbaycanlı olmağımla fəxr etdim.
Dekabr ayında biz Müdafiə Nazirliyinin xəttiylə Şuşaya getdik və orda tədbir keçirdik. Daha sonra isə bir müddət öncə Şuşada Cıdır düzündə "Xarıbülbül” festivalı keçirildi. Bir daha dünya şahidi oldu ki, Azərbaycanın necə zəngin musiqisi varsa, dahi Üzeyir Hacıbəyovun timsalında dünyaya çıxacaq klassik musiqimiz də var. Bu festivalda da iştirak etdim və bütün bunlar xoşbəxt günlərin anlarıdır. Müharibə bitəndən bu günə qədər hələ də o xoşbəxt hisslərlə yaşayıram”.
Qeyd edək ki, bu gün Əməkdar artist Kamran Kərimovun doğum günüdür.