Gündəm
Dollar manata nisbətdə bahalaşa bilərmi? - AÇIQLAMA
Valyuta hərracında dollara tələbat 48,6% artıb.
Cümə axşamı valyuta hərracında 62,3 milyon dollar satılıb.
Məlumdur ki, pandemiya səbəbilə xaricə gediş-gəliş əvvəlki səviyyədə deyil. Bu baxımdan, turizmin də inkişaf səviyyəsi aşağıdır.
Maraqlıdır, bütün bu amillərin fonunda dollara tələbin artması nədən qaynaqlanır? Bu dolların bahalşaması ehtimalından irəli gələ bilərmi?
Bununla bağlı Cebhe.info-ya açıqlamasında iqtisadçı-ekspert Rəşad Həsənov bildirib ki, bu artım hər il mart ayında təkrarlanır:
"Düşünmürəm ki, bu artım indiki halda dolların bahalaşması ilə əlaqədardır. Sadəcə olaraq, mart ayında ənənəvi qaydada valyutaya tələbat artır. Mart ayında iş günlərinin sayının az olması həraccaların sayının da azlığına gətirib çıxarır. Valyuta hərraclarının iştirakçısı da banklar olduğu üçün çalışırlar ki, daha çox valyuta toplasınlar. Bayram ərəfəsində isə istehlak prosesi nisbətən sürətlənir. Əhali bayram tədbirləri ilə bağlı bir çox məhsulları istehlak etməyə başlayır. Bəzi məhsullar da var ki, sırf həmin bayram dönəmində gətirilir, onun stoklarının yaradılması prosesi 1-2 ay öncədən başlayır. Burada da istehlakın artmasından qaynaqlanan bir valyuta tələbi də var.
Fikrimcə, indiki şərtlər daxilində Azərbaycan bazarında manatın məzənnəsini sarsıdaca biləcək alternativ təzyiqlər olsun. Çünki neftin qiyməti hökumətin nəzərdə tutduğundan qat-qat yuxarıdır. Digər məqamlar da hökumətin maraqlarına xidmət edir".