Sentyabr ayının 30-da Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyev və Azərbaycan Respublikasının I Vitse prezidenti, birinci Xanım Mehriban Əliyeva Ermənistanın sentyabrın 27-dən başlayan hərbi təxribatı zamanı yaralanan və Müdafiə Nazirliyinin Mərkəzi Hərbi Klinik Hospitalında müalicə olunan hərbçilərlə baş çəkmişlər.

Dogruxeber.az bildirir ki,görüşdə Ali Baş Komandan qeyd etmişdir ki, yaralanan əsgərin yarası hər bir azərbaycanlının yarasıdır. Vətən uğrunda gedən döyüşlərdə müxtəlif xəsarətlər alan əsgərlərə həkimlər yaxşı baxacaq, əllərindən gələni edəcək və gənclərimiz öz əsgər yoldaşlarının yanına qayıdacaqlar. Inanıram ki, yüksək döyüş ruhu və əzmkarlıq bizə qələbə qazandıracaqdır. Bütün yaralı əsgər və zabitlərimiz bir arzu ilə yaşayırlar ki, tezliklə sağalıb yenə də döyüş bölgələrinə getsinlər, Vətən uğrunda haqlı savaşını davam etdirsinlər.

Hər bir şəhid xalqın unudulmaz qəhrəmanıdır. Ölkəmizdə şəhid ailələrinə xüsusi diqqət göstərilir, dövlət tərəfindən bütün lazımi işlər görülür. Azərbaycan şəhid ailələrinə göstərilən diqqətə görə dünya miqyasında nümunə sayıla bilən ölkələrdəndir. Qarabağ müharibəsində həlak olmuş qəhrəman övladlarımızın ailələri tam miqyasda evlərlə, mənzillərlə təmin olunacaqdır. Dövlət olaraq Azərbaycan öz əsgərinin yanındadır. Qarabağ qazilərinə dövlət tərəfindən lazımi dəstək göstərilir, onların məişət problemləri həll olunur. Azərbaycan əsgəri xilaskar əsgərdir. Azərbaycan ordusunun əsgərləri öz doğma torpağında vuruşurlar və haqq yolunda yaralanırlar. Bizim əsgərlərimiz erməni əsgərlərindən fərqi ondadır ki, onlar işğalçı bizim əsgərlər isə xilaskardırlar.

Azərbaycan Ordusu uğurlu əməliyyat keçirərək strateji yüksəklikləri və bir neçə yaşayış məntəqəsini işğaldan azad edib. Haqq işi ilə peşəkarlıq birləşəndə qələbə qaçılmaz olur. Haqq, tarixi həqiqət, beynəlxalq hüquq Azərbaycanın tərəfindədir. Azərbaycan xalqı öz dövlətin ərazi bütövlüyünü bərpa edəcək. Orduda və cəmiyyətdə böyük ruh yüksəkliyi var. Qələbə qazanacağımıza əminik. Səmərəsiz danışıqların və kağız üzərində qalacaq bəyanatların heç bir əhəmiyyəti yoxdur. Mövcud danışıqlar formatı heç bir nəticə hasil etməyib və etməyəcəkdir də. Ona görə indiki şəraitdə hansısa tərəflərdən dialoqa çağırışlar yersiz və mənasızdır.

Azərbaycan öz dostlarını tanıyır və edilən yaxşılığı heç zaman unutmur. Bu günlərdə Azərbaycana dəstək olan ölkələri, təşkilatları, insanları heç vaxt unutmayacağıq. Məsuliyyətli Azərbaycan ölkəsi faşist Ermənistan rəhbərliyə qarşı vuruşur. Ermənistan rəhbərliyi yeni təxribatlar hazırlayır, Azərbaycanın yaşayış məntəqələrini yenə də atəşə tuturlar. Hər gün mülki əhali arasında itkilərimiz artır. Bu, erməni faşizminin eybəcər sifətini göstərir. Azərbaycan isə mülki əhaliyə qarşı heç vaxt vuruşmur və vuruşmayacaqdır.

"Vətən sağ olsun”. Cəbhə bölgəsində yaşayan soydaşlarımızın hamısı yerindədir, hamısı "Vətən sağ olsun” deyirlər və ordumuza güvənirlər. Əsgər yetişən gənclər üçün bir nümunədir. Azərbaycan əsgəri böyük qəhrəmanlıq, şücaət göstərib, Vətən uğrunda şərəflə vuruşub öz adlarını Azərbaycan tarixinə yazdırıb.

Yaralanan əsgərlər ilə görüşü zamanı Azərbaycan Respublikasının Birinci vitse-prezidenti Mehriban Xanım Əliyevanın kövrəlməsi və göz yaşlarını saxlaya bilməməsi, ana ürəyinin və qadın mərhəmətinin təcəssümüdür. Səmimi hisslər və dərdlərin bölüşməsi xalqımıza məxsus olan ülvi xüsusiyyətlərdən biridir.

(Əlizadə Elnur)