Gündəm
Belarusda müxalifətin Koordinasiya Şurasının yaradılması ilə bağlı cinayət işi başlandı
Belarusda keçmiş prezidentliyə namizəd Svetlana Tixanovskayanın tərəfdarlarının Koordinasiya Şurasının yaradılması ilə əlaqədar cinayət işi başlanıb.
Dogruxeber.az "Qafqazinfo” a istinadən xəbər verir ki, bu barədə Belarus Baş Prokurorluğunun Mətbuat xidməti açıqlama verib: "Koordinasiya Şurasının yaradılması ilə əlaqədar Cinayət Məcəlləsinin 361-ci maddəsi ilə cinayət işi başlanıb”.
Baş prokuror Aleksandr Konyuk isə "Koordinasiya Şurasının yaradılması və fəaliyyətinin dövlət hakimiyyətini ələ keçirmək, eyni zamanda Belarus Respublikasının milli təhlükəsizliyinə xələl gətirmək məqsədi daşıdığını” bildirib.
Qeyd edək ki, S.Tixanovskayanın seçki qərargahının çağırışı ilə hakimiyyətin ötürülməsinin təşkili məqsədilə Koordinasiya Şurası yaradılıb. Tixanovskaya prezident seçkilərində səslərin sayılmasından sonra elan edilən rəsmi nəticələri tanımadığını və özünü məğlub hesab etmədiyini bildirib.
1994-cü ildən bu vəzifəni tutan hazırkı dövlət başçısı Aleksandr Lukaşenko 9 avqust seçkilərinin qalibi elan edilib. MSK tərəfindən təsdiqlənmiş nəticələrə görə, seçicilərin 80,1%-i Lukaşenkoya, 10,12%-i isə əsas rəqibi Tixanovskayaya səs verib.