Gündəm
İş adamı baş redaktorun həbsini istəyir
İş adamı Məlahət Moşu qızı Qurbanova Criminal.az saytının baş redaktoru Anar Məmmədovla bağlı Yasamal rayon Məhkəməsində Cinayət Məcəlləsinin 147.1-ci və 148-ci maddələri ilə xüsusi ittiham qaydasında iddia qaldırıb.
"MUMTV.az”ın məlumatına görə, Məlahət Qurbanova iddiasında göstərib ki, Anar Məmmədov Criminal.az saytında şəxsi-qərəzlik məqsədi ilə onun işgüzar nüfuzuna və imicinə ləkə gətirən, şərəf və ləyaqətinə toxunan, cəmiyyət arasında nüfuzdan salan, guya "Lombard Məlahət” kimi tanınması haqqında böhtan xarakterli məlumat yerləşdirib.
O, bildirib ki, özü heç bir lombard fəaliyyəti ilə məşğul deyil, belə bir fəaliyyət növü ilə məşğul olmaq üçün qeydiyyatda da deyil.
"Anar Məmmədov həmin yazısında "Məlahət" MMC-nin istifadəsində olan qeyri-yaşayış sahəsinə xəlvəti olaraq qanunsuz çıxarış almış Ələkbərov Fizulini müdafiə etmək və bununla da, məhkəmədə baxılan həmin mülki iş üzrə qərar qəbul edilməsinə təsir etmək məqsədi güdüb. "Lombard Məlahət" sözünün mənə aid olmaması barədə təkzib verməsinə, atdığı böhtana, imicimə vurduğu ziyana və şərəf-ləyaqətimi təhqir etdiyinə görə ona xəbərdarlıq məktubu da göndərmişəm. Lakin Anar Məmmədov məndən üzr istəməyib və yazdığı "Lombard Məlahət" sözünün mənim fəaliyyətimə aid olmadığını da təkzib edən yazı verməyib. Ona görə də, xahiş edirəm ki, Anar Məmmədovun Cinayət Məcəlləsinin 147.1-ci və 148-ci maddələri ilə cinayət məsuliyyətinə cəlb edilməsinə dair ittihamedici qərar çıxarasınız”, - deyə M.Qurbanova iddiasında qeyd edib.
İddia ilə bağlı bu gün Yasamal rayon Məhkəməsində hakim Murad Məmmədovun sədrliyi ilə hazırlıq iclası keçirilib. Cavabdeh Anar Məmmədov iddia ilə tanış olmaq üçün məhkəmədən vaxt istəyib. Hakim hazırlıq iclasını oktyabrın 23-ü saat 12.00-a təyin edib.
A.Məmmədov bildirib ki, Criminal.az saytında Məlahət.Qurbanova ilə keçmiş nazir Fizuli Ələkbərovla aralarında olan məhkəmə haqda yazı dərc olunub. Yazıda Məlahət Qurbanovanın da mövqeyi yer alıb.
Baş redaktorun sözlərinə görə, M.Qurbanova iddiasında heç bir lombard fəaliyyəti ilə məşğul olmadığını bildirsə də, "Lombard N:1”in saytında həmin təşkilatın rəhbəri kimi Məlahət xanımın adı göstərilib. "Digər tərəfdən "Lombard Məlahət” sözündə heç bir təhqirdən söhbət gedə bilməz, bu formada təqdimat onun sırf fəaliyyəti ilə bağlıdır.
Məlahət Qurbanovanın iddiası tam absurddur. Əksinə, Məlahət Qurbanova iddiası ilə mənə qarşı böhtana yol verib. Eyni zamanda, Məlahət xanımın bu addımı mənim əsassız məhkəməyə çəkilməyimə və susdurulmağıma hesablanıb. Bunun özü qanunsuzluqdur. Əsassız məhkəməyə vermə də əlavə məsuliyyət yaradır. Vəkilllərimlə məsləhətləşdikdən sonra iddiasında mənə qarşı yol verdiyi böhtana görə məhkəmə davası açacam”, - deyə baş redaktor əlavə edib./Yeni Sabah