Ş.Ramaldanov bildirib ki, Ernənistanda "Müdafiə haqqında" qanuna edilən dəyişikliklərə əsasən, ölkədə könüllü hərbi dəstələrin yaradılması nəzərdə tutulur:

"Bu çox mənasız və absurd bir layihədir. Ümumiyyətlə, hərbi ritorikada "könüllü hərbi dəstələr” deyilən bir anlayış yoxdur. Çünki bu gün dünya tam olaraq peşəkar ordu sisteminə keçir. Əgər ölkə müharibə təhlükəsi ilə üzləşərsə, bu zaman ehtiyatda olan hərbiçilər və ya orduya yararlı sivil vətəndaşlar qanunlar çərçivəsində orduya cəlb edilir. Bir daha qeyd edirəm ki, səfərbərlik prosesi də müəyyən qaydalar əsasında aparılır.

Görünür, Ermənistan dünyada bir "ilkə imza ataraq”, könüllü hərbi dəstələr yaratmaq qərarına gəlib. Əslində, belə bir qanun qəbul edilməsini normal qarşılamaq lazımdır. Çünki rəsmi İrəvanı belə bir addımı atmağa vadar edən səbəblər var.

Birincisi, bu gün Ermənistanda ciddi bir demoqrafik problem yaşanır. Ölkə vətəndaşları social-iqtisadi problemlər səbəbindən sürətlə ölkəni tərk etməyə başlayıb. İstər-istəməz bu, orduya da təsir edir. Çünki demoqrafik problem orduya çağırılan gənclərin azalması deməkdir.

İkincisi, Ermənistan ordusu bu gün say etibarilə Azərbaycandan qat-qat azdır. İki ölkənin mövcud canlı qüvvəsi, ehtiyatda olan hərbi qüvvəsi və ən əsası ehtimal müharibə zamanı səfərbərlik potensialını müqayisə etdikdə, biz bariz fərqləri görə bilərik. Bu mənada Ermənistan öz ordusunun say tərkibini bu yolla artırmaq istəyir.

Üçüncüsü, Ermənistan bu yolla həm də xarici ölkələrdən gətirdiyi terrorçu, eyni zamanda muzdlu hərbi qrupları leqallaşdıra biləcəyini düşünür. Lakin işğalçı dövlət bu yolla sadəcə özünün qanunsuz fəaliyyətləri sırasına bir yenisini əlavə etmiş olacaq”.