Avropa Komissiyası koronavirus pandemiyasından sonra bu yay Avropada turizmin bərpasına dair təlimat yayımlayıb.

Mumtv.az "Qafqazinfo”-a istinadən xəbər verir ki, müvafiq sənədlər komissiyanın internet saytında yerləşdirilib. Plana görə, turistlərin üzünə açılmaq üçün dövlətlər tədricən və koordinasiyalı olaraq sərbəst hərəkətə icazəni bərpa etməli və ilk növbədə oxşar epidemioloji vəziyyətə malik olan Avropadaxili ölkələrlə sərhəd nəzarətini ləğv etməlidir.

Bundan əlavə, sərhədləri açacaq ölkələr yeni təhlükəsizlik prinsiplərini nəzərə alaraq, nəqliyyat xidmətlərinin - hava, dəmir yolu, avtomobil və su nəqliyyatı ilə sərnişin daşınmasının və həmçinin turizm infrastrukturu obyektlərinin - otellər və digər qonaqlama müəssisələrinin, çimərliklərin, istirahət mərkəzlərinin, restoranların, barların və kafelərin fəaliyyətini bərpa etməlidir.

Bundan əlavə, təlimatda səyahət edənlər üçün anonim məlumatlara əsaslanaraq COVID-19 ilə əlaqəli potensial riskləri izləməyə və bu barədə vaxtında xəbərdarlıq almağa imkan verəcək xüsusi tətbiqetmələrin hazırlanması tövsiyə edilib. Son olaraq isə Avropa Komissiyası uçuşları ləğv edilmiş müştərilər üçün alternativ vauçerlərin təqdim olunmasını məsləhət görüb.

Sənədlərin Aİ ölkələri üçün tövsiyə xarakterli olduğu, son qərarlarının isə həmin ölkələrin səlahiyyətli orqanları tərəfindən müstəqil şəkildə qəbul ediləcəyi bildirilib.